სპორტისა და ახალგაზრდულ საქმეთა სამინისტროში საგარეო საქმეთა, დიასპორისა და სპორტისა და ახალგაზრულ საქმეთა მინისტრები უკრაინელი ბავშვებისთვის ანაკლიის ახალგაზრულ ბანაკში დასვენების პროექტს გაეცნენ.
პროგრამა საქართველოს პრემიერ-მინისტრის იმ ინიციატივის ნაწილია, რომლის მიხედვიტაც საქართველო უკრაინას ჰუმანიტარულ დახმარებას გაუწევს. როგორც ,,ჯი-ეიჩ-ენს" საგარეო უწყებიდან აცნობეს საქართველო უზრუნველყოფს უკრაინაში არსებული სიტუაციით დაზარალებული უკრაინელი მოზარდების დასვენებასა და რეაბილიტაციას ანაკლიის ახალგაზრდულ ბანაკში.
შემუშავებულ იქნა სპეციალური 15-დღიანი სოციალური რეაბილიტაციის პროგრამა.
16 სექტემბერს უკრაინიდან საქართველოში გამოემგზავრება 130-მდე უკრაინელი ახალგაზრდა და მათი თანმხლები პირი.
"ყურადღება ბავშვებზე გავამახვილეთ რამეთუ ომის დროს ყველაზე მეტად სწორედ ისინი ზარალდებიან. საგარეო საქმეთა სამინისტრო და საქართველოს საელჩო კიევში აქტიურად არის ჩართული ამ პროცესში. აღნიშნული ინიციატივის განხორციელების ფარგლებში კიევში საქართველოს საელჩო თანამშრომლობს უკრაინის საგარეო საქმეთა და სოციალური პოლიტიკის სამინისტროებთან. მოზარდთა შერჩევა განხორციელდა უკრაინის სოციალური პოლიტიკის სამინისტროს მიერ და მოზარდთა ჯგუფი დაკომპლექტდა უკრაინაში ანტიტერორისტული ოპერაციის ზონაში მცხოვრები და იძულებით გადაადგილებული ახალგაზრდებით."-განაცხადა საგარეო საქმეთა მინისტრმა მაია ფანჯიკიძემ