მიმდინარე წლის 15 სექტემბერს, ფინანსთა მინისტრმა ნოდარ ხადურმა სასწავლო წლის დაწყება სკოლის მოსწავლეებსა და სტუდენტებს ივ. ჯავახიშვილის სახელობის თბილისის სახელმწიფო უნივერსიტეტიდან მიულოცა, სადაც იგი ეკონომიკისა და ბიზნესის ფაკულტეტის პირველკურსელთა საზეიმო მიღებას დაესწრო.
პირველკურსელებსა და სტუდენტებს სასწავლო წლის დაწყება ასევე მიულოცეს დედაქალაქის მერმა დავით ნარმანიამ, ფაკულტეტის დეკანმა თეიმურაზ ბერიძემ, სასწავლო პროგრამების ხელმძღვანელებმა და პროფესორ-მასწავლებლებმა.
„დღეს საქართველოს საჯარო სკოლებსა და უმაღლეს სასწავლებლებში ახალი სასწავლო წელი დაიწყო. ათასობით პირველკლასელი და პირველკურსელი საკუთარი და საქართველოს წარმატებისათვის პირველ, სერიოზულ, ხშირ შემთხევაში გადამწყვეტ ნაბიჯს დგამს. მინდა მათ ეს დღე მივულოცო. დარწმუნებული ვარ, რომ მათი მოლოდინი, რაც უკავშირდება თსუ-ში ცოდნის მიღებას, გამართლდება და ისინი ძალიან კარგი სტუდენტები გახდებიან," - განაცხადა ფინანსთა მინისტრმა ნოდარ ხადურმა.
„დღეს ამ ახალგაზრდების ცხოვრებაში ძალიან მნიშვნელოვანი ეტაპის დასაწყისია. მათ უნდა მიიღონ კვალიფიციური განათლება, შეიძინონ გამოცდილება, რათა მომავალში აქტიურად გააგრძელონ მუშაობა," - აღნიშნა დედაქალაქის მერმა დავით ნარმანიამ.
დღესვე სამახსოვრო საჩუქრებით ეკონომიკისა და ბიზნესის ფაკულტეტის ის პირველკურსელები დააჯილდოვეს, რომლებმაც ერთიან ეროვნულ გამოცდებზე უმაღლესი ქულები მიიღეს.
მასალის გამოყენების პირობები
