თბილისის მერის მოვალეობის ყოფილი შემსრულებლისა და თბილისის საკრებულოს ფრაქცია ,,ნაციონალური მოძრაობის" წევრი სევდია უგრეხელიძის განცხადებით ქალაქის მოქმედი მერი დავიტ ნარმანია საერთოდ არ იცნობს საბანკო სისტემას და აქედან გამომდინარე მისი კომენტარები სრულიად აბსურდულია. როგორც უგრეხელიძემ ჟურნალისტებთან ნარმანიას დღეს გაჟღერებული ბრალდებების საპასუხოდ განაცხადა მას არასწორ ინფორმაციას აწვდიან.
,,,ნარმანიამ პროცენტების თვლა რომ არ იცის და გამრავლების ტაბულასთან პრობლემები აქვს, ამაზე წინა ბრიფინგებზე უკვე ვისაუბრეთ. Aამიტომ, ის ინფორმაცია, რომელსაც მას აწვდიან არის აბსოლუტურად აბსურდი. ის როგორც ჩანს, საერთოდ არ იცნობს საბანკო სისტემას და აქედან გამომდინარე მისი კომენტარები არის სრულიად აბსურდული", _განაცხადა უგრეხელიძემ.
თბილისის მერის დავით ნარმანიას განცხადებით, თბილისის წინა მთავრობისა და „ლიბერთი ბანკის" გარიგებით თბილისის ბიუჯეტმა 10 მილიონ ლარზე მეტი დაკარგა.
საქმე ეხება თბილისის მერიასა და ,,ლიბერთი ბანკს" შორის 2010 წლის 26 აპრილს გაფორმებულ ხელშეკრულებას საბანკო მომსახურების შესახებ. აღნიშნული ბანკი მომსახურების გასაწევად მერიის მიერ გამოცხადებული კონკურსის საფუძველზე შეირჩა.
ხელშეკრულების მიხედვით, ბანკი მერიის ანგარიშებზე არსებულ მიმდინარე ნაშთებს სარგებელს არიცხავდა წლიური 16,05%-ის ოდენობით ლარში არსებულ თანხებზე, 11%-ს - აშშ დოლარში არსებულ თანხებზე და 8%-ს ევროში არსებულ თანხებზე. 2013 წლის 17 აპრილს თბილისის მერიასა და ბანკს შორის გაფორმდა შეთანხმება გარიგებაში ცვლილებებისა და დამატებების შესახებ, რომლის მიხედვითაც, საპროცენტო სარგებლის დარიცხვა შემცირდა და განისაზღვრა შემდეგნაირად:
,,მინიმალური ზღვარის" 40 მილიონი ლარის ქვემოთ არსებულ თანხას ამჟამად ერიცხება 16,05% ლარში არსებულ ნაშთებზე, ხოლო 40 მილიონ ლარზე ზემოთ არსებულ ნაშთს 4 პროცენტი, აშშ დოლარში არსებულ თანხებს ერიცხება 2 პროცენტი, ხოლო ევროში არსებულ თანხებს, ასევე, 2 პროცენტი. თბილისის მერიასა და „ლიბერთი ბანკს" შორის დადებულ ხელშეკრულებაში განხორციელებული ცვლილებით, თბილისის მერიას საპროცენტო შემოსავლების სახით 2013 წლის 17 აპრილიდან 2014 წლის აგვისტომდე დაახლოებით 10 მილიონ 500 ათასი ლარი დააკლდა. ვეჭვობთ, რომ ხელშეკრულებაში აღნიშნული ცვლილების შეტანა განპირობებული იყო გარიგებითა და კერძო ინტერესებით. შესაბამისად, არ გამოვრიცხავთ მერიის ყოფილი მაღალჩინოსნების კორუფციული ქმედებების ნიშნებსაც. აქედან გამომდინარე, მოძიებულ დოკუმენტაციას შემდგომი რეაგირებისთვის შესაბამის ორგანოებს ვუგზავნით", _განაცხადა ნარმანიანმ.
