თბილისის მერი დავით ნარმანია 2001 წლის 11 სექტემბრის ტერაქტის 13 წლისთავისადმი მიძღვნილ ოფიციალურ მიღებას დაესწრო. როგორც ნარმანიანმ განაცახდა განვლილმა წლებმა დაადასტურა, რომ ტერორისტებმა შეძლეს, დაენგრიათ ცათამბჯენები, მაგრამ ვერ შეძლეს დაენგრიათ ამერიკელი ხალხისა და მთელი მსოფლიოს თავისუფლებისმოყვარე ადამიანთა მტკიცე რწმენა და ერთგულება დემოკრატიული იდეალებისადმი.
,,თბილისი და თბილისელები კიდევ ერთხელ გულწრფელად ვუთანაგრძნობთ ჩვენს ამერიკელ დებსა და ძმებს, ნიუ-იორკისა და ვაშინგტონის მაცხოვრებლებს, ყველა ამერიკელს თუ უცხოელს, იმ უდიდესი დანაკარგის, იმ ტკივილის გამო, რაც მათ განიცადეს"- განაცხადა დავით ნარმანიამ თავის გამოსვლაში.
მისი თქმით, საქართველოს თავისი წვლილი შეაქვს ტერორიზმის წინააღმდეგ მსოფლიოს სამართლიან ომში. ათასობით ქართველი, მათ შორის, ბევრი თბილისელი იბრძვის ავღანეთში, ამერიკელი მეგობრების მხარდამხარ, რათა დაეხმაროს ავღანელ ხალხს, გათავისუფლდეს ექსტრემისტთა ძალმომრეობისაგან.
თბილისის მერმა ამერიკელ მეგობრებს მშვიდობა უსურვა და იმედი გამოთქვა, რომ საერთო ძალისხმევა შედეგს გამოიღებს და მომავალი თაობა იცხოვრებს ისეთ მსოფლიოში, სადაც აღარ იარსებებს ტერორიზმის საფრთხე.
,,ამერიკის მეგობართა კლუბის" მიერ ორგანიზებულ მიღებას საქართველოში აკრედიტებული დიპლომატიური კორპუსის, მთავრობისა და პარლამენტის წევრები და საზოგადოების წარმომადგენლები ესწრებოდნენ.