საპატრიარქო ქობულეთში მომხდარ რელიგიურ დაპირისპირებას ეხმიანება და მას პროვოკაციას უწოდებს. როგორც დეკანოზმა დავით შარაშენიძემ ჟურნალისტებთან საპატრიარქოს განცხადების წარდგენისას განმარტა, ისლამური სკოლა-პანსიონის აშენება ხელისუფლებასთან შეუთანხმებლად მოხდა.
,, რა თქმა უნდა, პროვოკაციას ჩვენ ვხედავთ 10 სექტემბერს ჩადენილ ქმედებაში, მაგრამ ვხედავთ იმაშიც, რომ მოსახლეობის აბსოლუტური უმრავლესობის ნების საწინააღმდეგოდ და ხელისუფლებასთანაც შეუთანხმებლად მოხდა ისლამური სკოლა-პანსიონის აშენება, რომლის რელიგიური დანიშნულებაც ეჭვგარეშეა. ძალიან სერიოზულ ეჭვს იწვევს ის გარემოება, რომ მომხდარი ერთის მხრივ დაემთხვა იმ დროს როდესაც საქართველოში დაგეგმილია თურქეთის რელიგიის საქმეთა სამმართველოს თავმჯდომარის ვიზიტი, მეორეს მხრივ, თბილისში იმართება ორდღიანი საერთაშორისო კონფერენცია რელიგიის თავისუფლბების თემაზე, რომელშიც გაეროს სპეციალური მომხსენებელი მონაწილეობს", _განაცხადა დეკანოზმა დავით შარაშენიძემ.
შეგახსენებთ, ქობულეთში ადგილობრივები მუსლიმური სასწავლებლის გახსნას აპროტესტებენ. შენობასთან მოსახლეობამ პროტესტის ნიშნად, გუშინ ღორი დაკლეს, თავი კი კარზე დაკიდეს.
