საქართველოს იუსტიციის მინისტრმა თეა წულუკიანმა საქართველოში აშშ-ის ელჩისადმი გაგზავნილ წერილში კიდევ ერთხელ გაიხსენა ამერიკელი ხალხის მიერ გაღებული მსხვერპლი და ხაზი გაუსვა იმ სიმამაცეს, რომელიც ამერიკის შეერთებულმა შტატებმა ძალადობისა და ტერორიზმისაგან საერთაშორისო საზოგადოების დასაცავად გამოიჩინა.
„ძვირფასო ბატონო ნორლანდ,
ნება მიბოძეთ, ამ წერილით პატივი მივაგო ამერიკის შეერთებული შტატების 11 სექტემბრის ეროვნული ხსოვნის დღეს.
ეს დღე აღმნიშვნელია იმ მნიშვნელოვანი მომენტისა, რაც გვახსენებს ამერიკელი ხალხის მიერ გაღებულ მსხვერპლს და საშუალებას გვაძლევს, აღვნიშნოთ ის განუმეორებელი სიმამაცე, რომელიც ამერიკელმა ხალხმა გამოიჩინა ამერიკისა და საერთაშორისო საზოგადოების ძალადობისა და ტერორიზმისაგან დასაცავად.
ეს დღე, ასევე, აღნიშნავს საქართველოს მთავრობის ურყევ ნებას, მხარი დაუჭიროს მის სტრატეგიულ პარტნიორსა და მეგობარს ტერორისტული აქტების წინააღმდეგ საერთაშორისო მშვიდობისა და უსაფრთხოებისათვის ბრძოლაში, გაერო-ს ქარტიის შესაბამისად.
სწორედ ამ კონტექსტში საქართველოს იუსტიციის სამინისტრო ახორციელებს მრავალმხრივ სამართლებრივ და სასამართლო რეფორმებს, რაც ხელს უწყობს საქართველოში დემოკრატიული სტაბილურობისა და უსაფრთხოების, ამავე დროს, სამართალზე დაფუძნებული საერთაშორისო წესრიგისა და ევროატლანტიკური უსაფრთხოების განმტკიცებას. პარალელურად, თანამშრომლობამ აშშ-ის მთავრობის შესაბამის უწყებებთან ორმხრივ და მრავალმხრივ ფორმატში, კერძოდ კი, გაერო-ს უშიშროების საბჭოს სანქციების კომისიის ფარგლებში, რომელსაც მე ვხელმძღვანელობ, ახალ საფეხურზე გადაინაცვლა.
დღეს ვიხსენებთ და ვგლოვობთ მათ, ვინც შეეწირა 2001 წლის 11 სექტემბრის მოვლენებს და კიდევ ერთხელ პატივს მივაგებთ და ვაცნობიერებთ იმ დიდ ცვლილებებს, რაც მათ მოუტანეს მსოფლიოს. ჩვენ მხარდამხარ ვდგავართ ამერიკელი ხალხის გვერდით, რათა ერთად შევასრულოთ მნიშვნელოვანი მისია - დავიცვათ ჩვენი ქვეყნები და გავამყაროთ ის საერთო ღირებულებები, როგორიცაა: თავისუფლება, კანონის უზენაესობა, თანასწორობა, ადამიანთა უფლებები, სამართლიანობა და განვითარება.
გთხოვთ, მიიღოთ ჩემი უღრმესი პატივისცემა", - ნათქვამია წერილში.
