9 სექტემბერს, ფინანსთა მინისტრმა, ნოდარ ხადურმა და სასჯელაღსრულებისა და პრობაციის მინისტრმა, გიორგი მღებრიშვილმა სასჯელაღსრულების №5 ნახევრად ღია და დახურული ტიპის ქალთა დაწესებულების ბრალდებულ და მსჯავრდებულ ქალბატონებს, რომლებთაც მცირეწლოვანი შვილები ჰყავთ ფინანსთა სამინისტროს მომსახურების სააგენტოს დახმარებით ტანსაცმელი, ფეხსაცმელი, სათამაშოები და ბავშვის მოვლის საშუალებები გადასცეს. მინისტრებმა ასევე დაათვალიერეს ინფრასტრუქტურა და გაესაუბრნენ ქალბატონებს. აღნიშნულ ღონისძიებას ფინანსთა სამინისტროს მომსახურების სააგენტოს გენერალური დირექტორი ზურაბ ახალკაციშვილი დაესწრო.
,,ჩვენთვის ეს ძალიან მნიშვნელოვანია, ეს აქცია არ იქნება ერთჯერადი და ფინანსთა სამინისტრო გააგრძელებს იმ ბავშვების დახმარებას, რომელთაც ცხოვრების პირველი წლების გატარება სასჯელაღსრულების დაწესებულებაში დედებთან ერთად უწევთ" - განაცხადა ფინანსთა მინისტრმა, ნოდარ ხადურმა.
„პირველი დაწესებულება, რომელიც მინისტრად დანიშვნის შემდეგ დავათვალიერე, სწორედ ქალთა დაწესებულება და დედათა და ბავშვთა სახლი გახლდათ. ჩემთვის, პირველ რიგში, როგორც მამისთვის და შემდეგ, როგორც მინისტრისთვის ძალიან მნიშვნელოვანია ის ფაქტი, რომ ამ დაწესებულებაში იმყოფებიან ბავშვები დედებთან ერთად, - განაცხადა გიორგი მღებრიშვილმა.
დედათა და ბავშვთა სახლში შექმნილია ყველა პირობა არასრულწლოვნებისთვის და მათი მშობლებისთვის.
მასალის გამოყენების პირობები