ჩვენ კარგად ვიცით, რომ სწორედ განათლებულ საზოგადოებას შესწევს უნარი, ქვეყანა თანამედროვე, წარმატებულ სახელმწიფოდ აქციოს, - ამის შესახებ საქართველოს პრემიერ-მინისტრმა ირაკლი რარიბაშვილმა პედაგოგებთან გამართულ შეხვედრაზე განაცხადა.
"ჩვენ კარგად ვიცით, რომ სწორედ განათლებულ საზოგადოებას შესწევს უნარი, ქვეყანა თანამედროვე, წარმატებულ სახელმწიფოდ აქციოს. ჩვენ საფუძვლიანად შევისწავლეთ განათლების სისტემაში არსებული ვითარება და ვიცით, რა მიმართულებით უნდა ვიმუშაოთ მეტი ძალისხმევით", - განაცხადა პრემიერმა.
მისივე თქმით, შემუშავდა განათლებისა და მეცნიერების სისტემის განვითარების სტრატეგია, რომელიც კიდევ უფრო ეფექტიანს გახდის შემდგომ ნაბიჯებს განათლების სფეროში.
პრემირმა განაცხადა, რომ ევროკავშირთან ასოცირების ხელშეკრულების ხელმოწერის შემდეგ საქართველო განვითარების თვისებრივად ახალ ფაზაში შევიდა, ახალი რეალობა და ქვეყნის წინაშე მდგარი სერიოზული გამოწვევები კი, განათლების სისტემასაც ეხება.
"იმისათვის, რომ ევროპულ საგანმანათლებლო სივრცეში სრულფასოვანი ინტეგრაცია შევძლოთ, ჩვენ მოკლე დროში უნდა ავამაღლოთ განათლების ხარისხი. ეს არის ჩვენი მთავარი მიზანი", - განაცხადა ირაკლი ღარიბაშვილმა.
პრემიერის განმარტებით, განატლების ხარისხის ამაღლებაზე ბევრადაა დამოკიდებული
ინტელექტუალური რესურსის გადინების საფრთხე.
„2012 წლიდან მოყოლებული, იზრდება ინვესტიციები განათლებასა და მეცნიერებაში. სწორედ ამ სფეროდან ველოდებით ყველაზე დიდ უკუგებას. ყველას კარგად მოგეხსენებათ, რომ გვქონდა პრობლემები განათლების ხელმისაწვდომობის კუთხით. დღეს კი ამ მხრივ მნიშვნელოვანი შედეგები გვაქვს - ჩვენ მიერ განხორციელებული რეფორმების შედეგად 60 პროცენტით შემცირდა ოჯახის წლიური დანახარჯი ზოგად განათლებაზე. უკვე მეორე წელია, სახელმწიფო უზრუნველყოფს სკოლის მოსწავლეებს სახელმძღვანელოებით, რაც დიდი შეღავათია ოჯახებისთვის", - განაცხადა პრემიერ მინისტრმა.
მან ასევე აღნიშნა, რომ 1000-ზე მეტი სკოლაში ჩატარდა სარეაბილიტაციო სამუშაოები და ეს პროცესი კიდევ გაგრძელდება.
