პრემიერ-მინისტრის ინიციატივით შექმნილი სოლიდარობის ფონდის მუდმივმოქმედი კომისიის გადაწყვეტილებით, სოლიდური სიმსივნეებით დაავადებული 18 წლამდე ასაკის 11 ბავშვის მკურნალობა დაფინანსდა. გადაწყვეტილება კომისიამ პირველ სხდომაზე მიიღო, რომელიც მთავრობის ადმინისტრაციაში დღეს გაიმართა.
მუდმივმოქმედი კომისიის წევრებმა დაფინანსების მიღების მსურველთა 15 განაცხადი განიხილეს, საიდანაც 11 დაკმაყოფილდა. მათ შორის, დაფინანსდა სამი ბავშვის საზღვარგარეთ მკურნალობა. დაფინანსებისთვის გამოყოფილი ჯამური თანხის ოდენობა 96 ათას ლარს შეადგენს.
როგორც სოლიდარობის ფონდის აღმასრულებელმა დირექტორმა მარიამ ჯაშმა განმარტა, ოთხი განაცხადი, რომლებიც არ დაკმაყოფილდა, სოლიდური სიმსივნეების დიაგნოსტიკის და ასაკობრივ კრიტერიუმებში არ ჯდებოდა. თუმცა, კომისიამ ისინი ჯანდაცვის სამინისტროსა და თბილისის მერიის სოციალური მომსახურების სამსახურში გადაამისამართა და მათაც დამატებითი სახსრების მოძიების საშუალება მისცა.
„კომისიის პირველმა სხდომამ გვაჩვენა, რომ დღეისათვის მობილიზებული თანხა, რომელსაც 23 ათასი საჯარო მოხელე სწირავს ფონდს ყოველთვიური დონაციის სახით, საკმარისია, რათა 18 წლამდე სოლიდური სიმსივნეების მქონე ბავშვთა თანადაფინანსების პრობლემა საქართველოში სრულად იყოს გადაჭრილი",- აღნიშნა მარიამ ჯაშმა.
მთავრობის ადმინისტრაციის უფროსის მოადგილემ, ნინო კობახიძემ კომისიის სხდომის შემდეგ განმარტა, რომ უახლოეს პერიოდში დაიწყება თანხების გადარიცხვა, რათა ბენეფიციარებმა მომსახურება როგორც საქართველოში, ისე საზღვარგარეთ, შეუფერხებლად მიიღონ.
კომისიის შემადგენლობაში არიან სახელმწიფო სტრუქტურების, კერძო სექტორის, საერთაშორისო და არასამთავრობო ორგანიზაციების წარმომადგენლები.
