იუსტიციის სახლში, საქართველოში მცხოვრებ უცხოელთა მომსახურება კიდევ უფრო მარტივდება. დღეიდან იუსტიციის სახლში მისულ უცხოელებს მხოლოდ მათი მომსახურებისთვის განკუთვნილი სამუშაო ადგილებიდან მიაწვდიან სერვისების განვითარების სააგენტოს სერვისს. უცხოელთათვის სპეციალური მომსახურების ადგილის გამოყოფის გადაწყვეტილება მას შემდეგ იქნა მიღებული, რაც ძალაში შევიდა მოქლაქეობის შესახებ კანონში ცვლილებები და უცხოელთა დაინტერესება გაიზარდა ბინადრობის და იუსტიციის სამინისტროს კომპეტენციაში შემავალი სხვა საკითხების მიმართ.
იუსტიციის სახლში აღნიშნული სისტემის დანერგვა უცხოელთათვის საქართველოში ყოფნის პერიოდში დოკუმენტების მიღების კიდევ უფრო გამარტივებას ემსახურება. იუსტიციის სახლში მისულ უცხოელს საკონსულტაციო სივრციდან პირდაპირ უცხოელთა მომსახურებისთვის განკუთვნილ ოპერატორებთან გადაამისამართებენ. მომსახურება ორ ენაზე, ინგლისურად და რუსულ ენებზე იწარმოებს. სერვისების მიღება უცხოელთათვის ორივე ენაზე იუსტიციის სახლის ყველა სერვისზე იქნება შესაძლებელი.
„ ეს სიახლე უცხოელებს საშუალებას მისცემს მათთვის გასაგებ ენაზე მიიღონ ხარისხიანი მომსახურება. ისინი თვად აირჩევენ სასაუბრო ენას და მაღალკვალიფიციურ მომსახურებას მიიღებენ უკლებლივ ყველა სერვისზე, რომელსაც იუსტიციის სახლში გავცემთ. ჩვენ მოწოდებულნი ვართ იმისათვის, რომ მომხმარებელს მაქსიმალურად გავუმარტივოთ საქმე და მივაწოდოთ მაღალი ხარისხის სერვისი. აღნიშნული სიახლეც სწორედ ამ მიზანს ემსახურება" - განაცხადა იუსტიციის სახლის აღმასრულებელმა დირექტორმა ირაკლი ლომიძემ.
აღსანიშნავია, რომ იუსტიციის სახლს სხავადსხვა სერვისის მისაღებად ყოველდღიურად რამდენიმე ასეული უცხოელი აკითხავს. იმისათვის, რომ საქართველოში მცხოვრებმა უცხოელებმა დროულად შეიტყონ აღნიშნული სერვისის შესახებ, იუსტიციის სახლმა უკვე დაუგზავნა შესაბამისი წერილები საქართველოში მოქმედ საელჩოებს და საკონსულოებს. ამასთან, უცხოელებისათვის საჯარო რეესტრის სერვისების ხელმისაწვდომობის გაზრდის მიზნით, მსგავსი ტიპის მომსახურება იუსტიციის სახლში უკვე არსებობს.
იუსტიციის სახლი იუსტიციის სამინისტროს სერვისების სრულიად ახალი კონცეფციის მქონე საჯარო დაწესებულებაა, სადაც იუსტიციის სამინისტროს სამსახურების და სხვა უწყებების რევისები სისტემურად არის თავმოყრილი. კომფორტული გარემო და მაღალკვალიფიციური პერსონალი მომხმარებლის თავაზიან, სწრაფ და ხარისხიან მომსახურებას უზრუნველყოფს. იუსტიციის სახლი სახელმწიფო სერვისების გაუმჯობესებისათვის დაწესებული ნომინაციაში მსოფლიოს ერთ-ერთი ყველაზე პრესტიჟული ჯილდოს, გაერთიანებული ერების ორგანიზაციის გამარჯვებული გახდა.
