5 სექტემბერს ბათუმის პორტს ერთდროულად ორი საკრუიზო ხომალდი ესტუმრა. აჭარის ტურიზმის დეპარტამენტის ინფორმაციით, მსხვილი საკრუიზო ხომალდი "Azamara Quest" 1000-ამდე მგზავრს, ხოლო საკრუიზო გემი "Aegean Odyssey" 550-მდე მგზავრს ითვლის. საკრუიზო ხომალდებს დღის მანძილზე ექსკურსიებით მოემსახურება ადგილობრივი ტურისტული კომპანიები, ლაინერ "Azamara Quest"-ის მგზავრებს კი საღამოს 20:30 საათზე ხელოვნების ცენტრში აჭარის ქართული ნაციონალური ცეკვის სახელმწიფო ანსამბლის "ხორუმის" სპეციალურად გამართულ კონცერტს შესთავაზებენ.
აჭარის ტურიზმისა და კურორტების დეპარტამენტის ინფორმაციით, 2014 წლის იანვრიდან დღემდე (5 სექტემბრის ჩათვლით) 18 გემია შემოსული, რის შედეგადაც რეგიონს 8743 უცხოელი ტურისტი ესტუმრა. გასული წლის ანალოგიურ პერიოდში აჭარაში 9 გემი იყო შემუსული 2427 მგზავრით. დღევანდელი მონაცემებით 2013 წელთან შედარებით ბათუმში 2-ჯერ მეტი საკრუიზო ხომალდი შემოვიდა, ხოლო რაც შეეხება მგზავრებს, მათი რაოდენობა 3,5-ჯერ მეტადაა გაზრდილი.
აღსანიშნავია, რომ საკრუიზო ტურიზმის სტატისტიკის მიმართულებით დადებითი ტენდენცია შეინიშნება. თუკი 2012 წელს 10-მდე საკრუიზო ხომალდის სტუმრობდა რეგიონს, 2013 წელს მისი რიცხვი 16-მდე გაიზარდა, 2014 წელს კი 28 საკრუიზო გემის შემოსვლაა დაგეგმილი.
მასალის გამოყენების პირობები