დღეს, აჭარის მინისტრთა კაბინეტის წევრებმა, ნუგზარ სურმანიძემ და გიორგი თავამაიშვილმა ბათუმში აზერბაიჯანის საკონსულ გუსეინ ნაჯაფოვთან ერთად, ნახიჩევანიდან ბათუმში მყოფ ბავშვებს უმასპინძლეს. მთავრობის წარმომადგენლებმა ბავშვებთან ერთად ზღვაში გემით გაისეირნენ, მოგვიანებით ისინი კაფე „ცეროდენა"-ში მიიწვეს.
შეზღუდული შესაძლებლობის სტატუსის მქონე 15 აზერბაიჯანელი ბავშვი ააიპ სამედიცინო ასოციაცია „თანა"-ს სარეაბილიტაციო ცენტრში სარეაბილიტაციო და სამკურნალო კურსს 22 აგვისტოდან გადის.
ბავშვები უზრუნველყოფილნი არიან სადღეღამისო მომსახურებით და ექიმის მეთვალყურეობით. უტარდებათ სარეაბილიტაციო ღონისძიებები. პარალელურად მონაწილეობას ღებულობენ კულტურულ-საგანმანათლებლო და გასართობი პროექტებში. ისინი უკვე იმყოფებოდნენ დელფინარიუმში და ბოტანიკურ ბაღში, მოზარდებს ბათუმის მერმაც უმასპინძლა.
აჭარის მთავრობამ შშმ ბავშვების ბათუმში მოწვევის გადაწყვეტილება ბათუმში აზერბაიჯანის საკონსულოს მიერ აჭარაში მცხოვრები ბრონქული ასთმის და სასუნთქი სისტემის სხვადასხვა დაავადებების მქონე ბავშვების ნახიჩევანის სპეციალიზირებულ სარეაბილიტაციო ცენტრში მიწვევის შემდეგ მიიღო.
აზერბაიჯანელი ბავშვები ბათუმს 6 სექტემბერს დატოვებენ. სამშობლოში, 5 სექტემბერს დაბრუნდებიან ნახიჩევანში მყოფი ბრონქული ასთმით დაავადებული ქართველი ბაშვები, რომლებიც ნახიჩევანში 2 კვირაზე მეტია სანატორიულ-კურორტულ მკურნალობას გადიან.