თბილისის მერი დავით ნარმანია საქართველოში ვიზიტად მყოფ საბერძნეთის მართლმადიდებელი ეკლესიის რელიგიური ტურიზმის დეპარტამენტის მდივანს სპირიდონ კატრამადოსს, ბერძენ ბიზნესმენებს და საქართველოში საბერძნეთის საგანგებო და სრულუფლებიან ელჩს ელეფთერიოს პროიოსს შეხვდა.
შეხვედრაზე ისაუბრეს ორ ქვეყანას შორის რელიგიური ტურიზმის განვითარებასა და თბილისისა და ათენის დაძმობილების გეგმებზე. დავით ნარმანიას თქმით, ორი ქალაქის დაძმობილება კარგი საშუალებაა სხვადასხვა სფეროებში , მათ შორის რელიგიური ტურიზმის განვითარებაში გამოცდილების გაზიარების თვალსაზრისით, რაშიც აქტიურად უნდა ჩაერთონ ორი ქვეყნის ტუროპერატორი კომპანიები. მისივე თქმით, დაგეგმილია თბილისის ისტორიული ადგილების რეაბილიტაცია, რაც ხელს შეუწყობს თბილისში ტურისტების მოზიდვას და რელიგიური ტურიზმის განვითარებას.
შეხვედრაზე ხაზი გაესვა საბერძნეთის და საქართველოს მჭიდრო ისტორიულ კავშირებს. ელჩის თქმით, საბერძნეთში დღეისათვის 100 000-ზე მეტი ქართველი ცხოვრობს, საქართველოში ასევე არსებობდა ბერძნული დიასპორა და სწორედ ეს არის ორ ქვეყანას შორის ხიდი.
სპირიდონ კატრამადოსმა დავით ნარმანია ოქტომბრის ბოლოს, საქართველოს დელეგაციის დაგეგმილი ვიზიტის ფარგლებში საბერძნეთში მიიწვია და საბერძნეთის პატრიარქისგან საჩუქრად ხატი გადასცა.
თავის მხრივ, სტუმარი დავით ნარმანიამაც დაასაჩუქრა.
