ხვალ, 5 სექტემბერს, 14:00-ზე სამხატვრო აკადემიის სტუდენტები კულტურის სამინისტროსთან აქციას გამართავენ. სტუდენტები ითხოვენ მინისტრის ბრძანებაში სამხატვრო აკადემიის დებულებაში შეტანილ ცვლილებასთან დაკავშირებით, რომელიც რექტორის თანამდებობის დაკავებას ეხება.
"სამხატვრო აკადემიის სტუდენტები მოვითხოვთ სასწრაფოდ შეიცვალოს კულტურისა და ძეგლთა დაცვის მინისტრის, ბატონი მიხეილ გიორგაძის "ბრძანება" სამხატვრო აკადემიის დებულებაში შეტანილ ცვლილებასთან დაკავშირებით, რომელიც ეწინააღმდეგება საქართველოს კონსტიტუციას და არღვევს ადამიანის უფლებებს!
"საქართველოს კულტურისა და ძეგლთა დაცვის მინისტრის 2014 წლის 16 მაისის №05/89 ბრძანებაში შეტანილ იქნეს ცვლილება და ბრძანებით დამტკიცებული დებულების მე-9 მუხლის მე-4 პუნქტი ჩამოყალიბდეს შემდეგი რედაქციით:
„4. რექტორის თანამდებობის დაკავება შეუძლია პირს, რომელსაც უკავია პროფესორის აკადემიური თანამდებობა აკრედიტებულ უმაღლეს საგანმანათლებლო დაწესებულებაში და რომლის მიმართულებაც შეესაბამება აკადემიასა და მის ფაკულტეტებზე არსებულ საგანმანათლებლო პროგრამულ მიმართულებებს."
მე-9 მუხლის მე - 4 პუნქტით უხეშად ირღვევა სწორედ კონკურენციისა და თანასწორობის პრინციპი. კერძოდ, მუხლი იმპერატიულად ადგენს იმ ვიწრო წრეს, რომელსაც შეუძლია მონაწილეობა მიიღოს რექტორის არჩევნებში, ეს უკანასკნელი კი გულისხმობს იმას, რომ უკიდურესად იზღუდება კონკურსში მონაწილე პირთა წრე, რაც თავისთავად ქმნის არაჯანსაღი კონკურენციის საშიშროებას და უხეშად არღვევს თანასწორობის პრინციპს.
საქართველოს კონსტიტუციით ნებისმიერ მოქალაქეს უფლება აქვს დაიკავოს ნებისმიერი სახელმწიფო თანამდებობა თუ იგი აკმაყოფილებს კანონმდებლობით დადგენილ მოთხოვნებს.
კონსტიტუციის 29-ე მუხლი სახელმწიფოს ავალდებულებს, დაადგინოს სახელმწიფო თანამდებობაზე საქმიანობის გონივრული პირობები და გაუმართლებლად არ შეზღუდოს მოქალაქის უფლება, მონაწილეობა მიიღოს სახელმწიფო მართვაში, განახორციელეოს საჯარო მნიშვნელობის ფუნქცია", - ნათქვამია სტუდენტების მიმართვაში .
