24-25 აგვისტოს საქართველოს საგარეო საქმეთა მინისტრი მაია ფანჯიკიძე სამუშაო ვიზიტით ეწვევა ავსტრიის რესპუბლიკას, სადაც მონაწილეობას მიიღებს ალფბახის ყოველწლიურ პოლიტიკურ ფორუმში. 24 აგვისტოს საქართველოს საგარეო საქმეთა მინისტრი მოხსენებით წარდგება საერთაშორისო ფორუმის პლენარულ სესიაზე.
ღონისძიების მონაწილეთა შორის იქნებიან: ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში ქეთრინ ეშტონი, ავსტრიის ფედერალური პრეზიდენტი ჰაინც ფიშერი, ავსტრიის ევროპის, ინტეგრაციისა და საგარეო საქმეთა მინისტრი სებასტიან კურცი, ეუთო-ს გენერალური მდივანი ლამბერტო ზანიერი და სხვა მრავალი.
ალფბახში ვიზიტის ფარგლებში საქართველოს საგარეო საქმეთა მინისტრი ასევე მონაწილეობას მიიღებს ავსტრიის ევროპის, ინტეგრაციისა და საგარეო საქმეთა მინისტრის, სებასტიან კურცის სახელით გამართულ ვახშამში და დაესწება ლიხტენშტაინის სამთავროს პრემიერ-მინისტრის ანდრიან ჰასლერის მიერ ორგანიზებულ სადილს.
