დარიალის ხეობაში მომხდარ სტიქიასთან დაკავშირებით, კრიზისების მართვის საბჭო მორიგ განცხადებას აქვეყნებს.
როგორც საბჭოს განცხადებაშია აღნიშნული, გზის გახსნას სავარაუდოდ, მინიმუმ ორი კვირა დასჭირდება.
«დარიალის ხეობაში მომხდარ სტიქიასთან დაკავშირებით, პრემიერ-მინისტრთან შექმნილი საგანგებო შტაბის ხელმძღვანელობით, ინტენსიურად მიმდინარეობს შედეგების სალიკვიდაციო და აღდგენითი სამუშაოები.
ყველაფერი კეთდება ინფრასტრუქტურის მაქსიმალურად მოკლე ვადებში აღსადგენად. დილიდან გაგრძელდა საავტომობილო გზის გაწმენდის და აღდგენის სამუშაოები, რასაც ხელს უწყობს ამინდიც. ადგილზე მობილიზებულია საჭირო რაოდენობის მძიმე ტექნიკა, მობილიზებულია სარეზერვო ტექნიკაც. გზის გახსნას სავარაუდოდ დასჭირდება მინიმუმ ორი კვირა.
ამავდროულად, მიმდინარეობს სომხეთთან დამაკავშირებელი გაზსადენის აღდგენა, რასაც დასჭირდება დაახლოებით 2 დღე, რის შემდეგაც სომხეთი მიიღებს ბუნებრივ აირს.
პარალელურ რეჟიმში მიმდინარეობს ჰესის ტექნიკური გვირაბის გაწმენდა. გვირაბის ნაწილი ამ დროისთვის წყლისგან დაცლილია და მოხდა ამ მონაკვეთის დათვალიერება. თუმცა, აუცილებელია გვირაბის ჩრდილოეთ მხარის გახსნა, რათა გვირაბი სრულად დაიცალოს წყლისგან და დაგროვილი ღვარცოფული მასისგან.
წუხელ მდინარე თერგმა რუსეთის მხარეს გარიყა ცხედარი, რომელიც სავარაუდოდ არის სტიქიის ზონაში მოყოლილი თურქი მოქალაქე. ამ დროისთვის მიმდინარეობს გადმოსვენებისთვის საჭირო ღონისძიებები. სტიქიის დროს დაკარგული მეორე მოქალაქე ისევ არ არის ნაპოვნი.
მონასტრის მიმდებარე ტერიტორიაზე მყოფი მოქალაქეების ნაწილი, მიიღო რუსეთის მხარემ. გუშინვე დასრულდა დარჩენილი მგზავრების ნაწილის ევაკუაცია სტეფანწმინდაში.
დევდორაკის ხეობაში გუშინ გაიხსნა დამატებითი საგუშაგო, რომელიც განახორციელებს ვიზუალურ დაკვირვებას დევდორაკის მყინვარზე და ღვარცოფის ტრანზიტულ ზონაზე. ასევე მოქმედებს დამატებითი სეისმური სადგური», - ნათქვამია კრიზისების საბჭოს განცხადებაში.
