„დავით ნარმანია წარმატებით აგრძელებს ცენტრალური ხელისუფლების მიერ მყარად დამკვიდრებულ პრაქტიკას, საგამოძიებო ორგანოები გამოყენებული იქნას პოლიტიკური ზეწოლის ინსტრუმენტად", აღნიშნულის შესახებ საუბარია საპარლამენტო და თბილისის საკრებულის „ნაციონალური მოძრაობის" ფრაქციების ერთობლივ განცხადებაში.
„ნაციონალური მოძრაობა" მიიჩნევს, რომ დავით ნარმანიას აღნიშნული ადგილობრივი მერიის დაქვემდებარებაში მყოფი ორგანიზაციების საფინანსო-სამეურნეო საქმიანობის რევიზიისათვისდ თვითმმართველობის სისტემაში ორი უწყება არსებიბს, ესაა საკრებულოს სარევიზიო კომისია და მერიის შიდა აუდიტისა და მონიტორინგის საქალაქო სამსახური.
„გუშინ თბილისის მერმა, დავით ნარმანიამ განცხადება გააკეთა იმის თაობაზე, რომ მან მიმართა ფინანსთა სამინისტროს საგამოძიებო სამსახურს, დაეწყო მერიის დაქვემდებარებაში მყოფი ორგანიზაციების საფინანსო-სამეურნეო საქმიანობის რევიზია. საგამოძიებო სამსახური მერის მოთხოვნით ერთდროულად ათამდე ორგანიზაციის დოკუმენტაციას სწავლობს.
რბილად რომ ვთქვათ, უცნაურია რევიზიის ჩატარების მოთხოვნით უწყების ხელმძღვანელი, თბილისის მერი მიმართავდეს საგამოძიებო სამსახურებს, როდესაც მხოლოდ ადგილობრივი თვითმმართველობის სისტემაში მას აქვს ორი უწყება, საკრებულოს სარევიზიო კომისია და მერიის შიდა აუდიტისა და მონიტორინგის საქალაქო სამსახური, რომ არაფერი ვთქვათ სახელმწიფო აუდიტის სამსახურზე, რომელთა ერთადერთი ფუნქცია სწორედ ორგანიზაციების საქმიანობის შესწავლა, ნაკლოვანებების გამოვლენა და მათზე რეაგირების ღონისძიებების დასახვაა.
ნათელია, რომ დავით ნარმანია წარმატებით აგრძელებს ცენტრალური ხელისუფლების მიერ მყარად დამკვიდრებულ პრაქტიკას, საგამოძიებო ორგანოები გამოყენებული იქნას პოლიტიკური ზეწოლის ინსტრუმენტად. ეს განსაკუთრებით ცხადია თბილისის მერიაში მიმდინარე პროცესების ფონზე, როდესაც მასშტაბურად ხდება ადამიანების იძულება დატოვონ სამსახურები, მხოლოდ იმიტომ რომ მათი ადგილები მომავალში დაიკავონ ,,ქართული ოცნების" აქტივისტებმა და ხელისუფლების ნათესავებმა. ორგანიზაციების საქმიანობაში გარკვევის რეალური სურვილის არსებობის შემთხვევაში, დავით ნარმანიას მათი შემოწმება უნდა დაევალებინა მის სისტემაში არსებული მაკონტროლებელი სამსახურებისთვის და მხოლოდ დარღვევების დადასტურების შემდეგ მიემართა საგამოძიებო სამსახურებისთვის. შესაბამისად, მოვითხოვთ დავით ნარმანიამ დღესვე საჯარო გახადოს მიმართვის ის ტექსტი, რომელზე რეაგირებასაც ახდენს საგამოძიებო სამსახური. სავარაუდოდ ასეთი მიმართვა თითოეულ ორგანიზაციაში არსებული დარღვევების მითითებით არ არსებობს, რაც კიდევ ერთი დადასტურებაა რომ ფინანსთა სამინისტროს საგამოძიებო სამსახური ასრულებს ,,ქართული ოცნების" პოლიტიკურ დაკვეთას.
ცალსახაა, რომ ფინანსთა სამინისტროს საგამოძიებო სამსახურის მასშტაბური თავდასხმა თბილისის მერიაზე არაფერ კავშირშია მათ მიმდინარე საქმიანობასთან და ის მხოლოდამხოლოდ უკავშირდება იქ მომუშავე ადამიანების დაშინებას და იძულებას, ასევე თბილისის ახალი მთავრობის სრული უმოქმედობისა და უნიათობის ფონზე მოსახლეობისთვის ილუზიის შექმნას, რომ რაღაც კეთდება", - აღნიშნულია განცხადებაში.
იმავდროულად „ნაციონალური მოძრაობა" მოვუწოდებს დავით ნარმანიას, რომ მან გააცნობიეროს, რომ ის არის თბილისის მერი.
„შესაბამისად უნდა იყოს მის სისტემაში მომუშავე ყველა ადამიანის ინტერსების დამცველი და არ უნდა ცდილობდეს მათ დათრგუნვას, სამსახურებიდან გაყრას საგამოძიებო სამსახურების გამოყენებით. შევახსენებთ მას, რომ უხეში, უშედეგო ძალადობის ნაცვლად მისი თანამშრომლები მისგან ელოდებიან სამუშაოს განხორციელებისას მაქსიმალურ ხელშეწყობას, ხოლო თბილისელები კონკრეტული პროგრამებისა და იდეების განხორციელებას, რაც მათი ცხოვრების ხარისხს გააუმჯობესებს"- აცხადებენ „ნაციონალურ მოძრაობაში".