საქართველოს იუსტიციის სამინისტრო კანონთან კონფლიქტში მყოფი და დანაშაულის ჩადენის მაღალი რისკის მქონე არასრულწლოვნების რესოციალიზაციის მხარდამჭერ საგრანტო კონკურსს აცხადებს.
საქართველოს იუსტიციის სამინისტროს ინფორმაციით, საგრანტო კონკურსის გამოცხადება ემსახურება საქართველოს მიერ ნაკისრი საერთაშორისო ვალდებულებების შესრულების ხელშეწყობასა და დანაშაულის პრევენციისაკენ მიმართული ღონისძიებების ეფექტიანად წარმართვას.
"2004-2012 წლებში გატარებული ნულოვანი ტოლერანტობის პოლიტიკის შემდეგ, ხელისუფლებამ სისხლის სამართლის პოლიტიკის ლიბერალიზაცია გადაწყვიტა. მნიშვნელოვანი ყურადღება ექცევა პირველადი დანაშაულის ჩადენის პრევენციას და რეციდივის თავიდან აცილების მიზნით კანონთან კონფლიქტში მყოფი არასრულწლოვნების რეაბილიტაცია-რესოციალიზაციას. ქვეყანაში მიმდინარე არასრულწლოვანთა მართლმსაჯულების რეფორმა ითვალისწინებს არასრულწლოვანთა მიერ ჩადენილი დანაშაულის მაჩვენებლის შემცირებას - არასრულწლოვანთა მიერ დანაშაულის ჩადენის პრევენციას, კანონთან კონფლიქტში მყოფი არასრულწლოვნების რეაბილიტაციასა და მათ საზოგადოებაში ინტეგრაციას", - აცხადებენ სამინისტროში.
მათივე ინფორმაციით, არასრულწლოვანთა დანაშაულის მაჩვენებელი საკმაოდ მაღალია და საჭიროა განსაკუთრებული მიდგომა დანაშაულის ჩადენის ზღვარზე მყოფი არასრულწლოვნების მიმართ.
"აღნიშნულ ჯგუფთან მუშაობა და ადრეული ჩარევა ხელს შეუწყობს ქვეყანაში კრიმინალური ქცევის შემცირებას. ამ მხრივ, საყურადღებოა დანაშაულის ჩადენის ზღვარზე მყოფ ისეთ ჯგუფებთან მუშაობა, როგორებიცაა: 1) განათლების სისტემის მიღმა დარჩენილი არასრულწლოვნები; 2) ზრუნვის სისტემიდან გამოსულები; 3) პატიმრებისა და ყოფილი პატიმრების შვილები, რომლებიც ხშირად სტიგმატიზაციასაც განიცდიან; 4) 14 წლამდე არასრულწლოვნები რომლებმაც ჩაიდინეს დანაშაული, მაგრამ სისხლის სამართლის პასუხისგებაში არ მიეცნენ ასაკის გამო. ასევე, მნიშვნელოვანია იმ მოზარდებთან დანაშაულის ჩადენის პრევენციული ღონისძიებების გატარება, რომლებიც ანტისოციალური ქცევით გამოირჩევიან", - აცხადებენ სამინისტროში.
მათივე განმარტებით, არასრულწლოვანთა მართლმსაჯულება და კანონთან კონფლიქტში მყოფ არასრულწლოვანთა რეაბილიტაციისა და რესოციალიზაციის მხარდაჭერა სახელმწიფოს ერთ-ერთ პრიორიტეტულ საკითხს წარმოადგენს.
"არასრულწლოვანთა მართლმსაჯულების დახვეწისა და გაუმჯობესების კუთხით, დღეს არაერთი მნიშვნელოვანი ნაბიჯი იდგმება ზოგადად სახელმწიფოს და, განსაკუთრებით კი, იუსტიციის სამინისტროს მხრიდან. არასრულწლოვანთა მართლმსაჯულებაში ერთ-ერთ პრიორიტეტულ პროგრამას წარმოადგენს განრიდებისა და მედიაციის პროგრამა, როგორც სისხლისამართლებრივი პასუხისმგებლობისაგან გათავისუფლების მექანიზმი. პროგრამის მნიშვნელობას ადასტურებს არაერთი საერთაშორისო ხელშეკრულება თუ სხვა დოკუმენტი. გარდა ამისა, არაერთი შიდასახელმწიფოებრივი სამართლებრივი აქტი უსვამს სისხლისსამართლებრივი ალტერნატივების გამოყენების აუცილებლობას ხაზს", - განმარტავენ უწყებაში.
მათივე ინფორმაციით, დღეისათვის, არასრულწლოვნების მიერ დანაშაულის ჩადენის თავიდან აცილების და, აგრეთვე, განრიდებისა და მედიაციის პროგრამის მიზნებისათვის, განსაკუთრებით კი განმეორებითი დანაშაულის თავიდან ასაცილებლად, ყურადღება ექცევა ბენეფიციარებისათვის საჭირო სერვისების მიწოდებას და მათი მოთხოვნილებების დაკმაყოფილებას.
"არასრულწლოვანთა მართლმსაჯულების სფეროში მიმდინარე რეფორმების წარმატების უზრუნველსაყოფად, მნიშვნელოვანია ისეთი სერვისების შექმნა და განვითარება, რომლებიც რისკ ჯგუფების წარმომადგენლებს და კანონთან კონფლიქტში მყოფ არასრულწლოვნებს დაეხმარება მათ წინაშე არსებული სირთულეების დაძლევაში", - აცხადებენ სამინისტროში.
როგორც უწყებაში განმარტავენ, საგრანტო პროგრამის სამიზნე ჯგუფს წარმოადგენენ იუსტიციის სამინისტროს სსიპ დანაშაულის პრევენციის ცენტრის მიერ გადამისამართებული განრიდებისა და მედიაციის პროგრამის ბენეფიციარები და დანაშაულის ჩადენის მაღალი რისკის ქვეშ მყოფი არასრულწლოვნები, როგორებიცაა: 1) განათლების სისტემის მიღმა დარჩენილი არასრულწლოვნები; 2) ზრუნვის სისტემიდან გამოსულები; 3) პატიმრებისა და ყოფილი პატიმრების შვილები, რომლებიც ხშირად სტიგმატიზაციასაც განიცდიან; 4) 14 წლამდე არასრულწლოვნები რომლებმაც ჩაიდინეს დანაშაული, მაგრამ სისხლის სამართლის პასუხისგებაში არ მიეცნენ ასაკის გამო.
საგრანტო პროგრამის ფარგლებში დაფინანსებული პროექტების განხორციელება დაიწყება 2014 წლის 1-ლი ნოემბრიდან.
კონკურსის საკვალიფიკაციო მოთხოვნებია:
განმცხადებელი უნდა იყოს საქართველოში რეგისტრირებული არასამეწარმეო (არაკომერციული) იურიდიული პირი ან მისი ფილიალი, რომელსაც აქვს მინიმუმ ორწლიანი სამუშაო გამოცდილება, სასურველია კანონთან კონფლიქტში მყოფი არასრულწლოვნების ან რისკ ჯგუფებთან მუშაობის მიმართულებით. (გთხოვთ, წარმოადგინოთ რეგისტრაციის დამადასტურებელი ცნობა, რომელიც გაცემულია 2014 წლის 1-ლი ივლისის შემდეგ და ორგანიზაციის დებულება/წესდება), განმცხადებელს შეუძლია თითოეულ მიმართულებაზე არაუმეტეს ერთი განაცხადის წარმოდგენა;
საგრანტო განაცხადით მოთხოვნილი გრანტის მოცულობა არ უნდა აღემატებოდეს საგრანტო პროგრამის შესაბამისი მიმართულებით გათვალისწინებული დაფინანსების ზედა ზღვარს.
საგრანტო კონკურსში მონაწილეობის მისაღებად, არანაირი თანამონაწილეობა არ არის სავალდებულო.
საგრანტო განაცხადი მსურველები უნდა გააგზავნონ ელექტრონულ ფოსტაზე: grants@justice.gov.ge. დამატებითი ინფორმაციის მიღება შესაძლებელია აღნიშნულ ელ-ფოსტაზე ან ნომერზე: 591 41 45 25 - ნათია სირდაძე - საგრანტო საქმიანობის მენეჯერი.
საგრანტო განაცხადის წარმოდგენის ბოლო ვადაა 2014 წლის 12 სექტემბერი - 18:00 საათი.
დამატებითი ინფორმაციის მიღება შესაძლებელია სამინისტროს ვებ-გვერდზე.
მასალის გამოყენების პირობები