საქართველოს პრემიერ-მინისტრის ინიციატივით შექმნილი სოლიდარობის ფონდი განაცხადების მიღებას 1-ლი სექტემბრიდან დაიწყებს, - ამის შესახებ სოლიდარობის ფონდის სამეთვალყურეო საბჭოს დღევანდელი სხდომის შემდეგ გახდა ცნობილი, რომელიც ირაკლი ღარიბაშვილის ხელმძღვანელობით პირველად გაიმართა.
სამეთვალყურეო საბჭომ დღესცე დაამტკიცა მუდმივმოქმედი კომისიის კონცეფცია, ხოლო ფონდის ხელმძღვანელად არჩეულია ჯანდაცვის მინისტრის მოადგილე მარიამ ჯაში.
„დღევანდელი მონაცემებით, საჯარო სექტორში 14 ათასმა ადამიანმა გამოხატა ნებაყოფლობით დონაციის სურვილი და შენატანების მიხედვით ყოველთვიურად 150 ათას ლარამდე ავედით. პირველი სექტემბრიდან დავიწყებთ განაცხადების მიღებას და იმედია, სექტემბერშივე შევძლებთ 4-5 ბავშვის დაფინანსებას. ფონდის მუშაობაში ჩართულია კერძო სექტორიც. ვიმედოვნებთ, წლის ბოლომდე მოხდება დაახლოებით 8 მილიონის მობილიზება, რომელიც მთლიანად ონკოლოგიური დაავადებების მქონე ბავშვებს მოხმარდებათ და შევძლებთ მათ როგორც საზღვარგარეთ მკურნალობას, ისე - ძვირადღირებული მედიკამენტების შეძენას", - განაცხადა სხდომის შემდეგ საქართველოს მთავრობის ადმინისტრაციის უფროსის მოადგილემ ნინო კობახიძემ.