სანდრო გირგვლიანის საქმეზე სასამართლო პროცესი 20 აგვისტოსთვის გადაიდო. დღეს სასამართლოსთვის ჩვენება კუდის ყოფილს მაღალჩინოსანს ოლეგ მელნიკოვს ოქროყანის ეპიზოდზე ჩვენების მიცემა უნდა დაესრულებინა.
მელნიკოვის შემდეგ, გამოძიებას თათია მაისურაძე უნდა დაეკითხა, რომელიც "შარდენ ბარში" განვითარებული მოვლენების ერთ-ერთი მთავარი მოწმეა.
პროცესის გადადების მიზეზი საქმეში ჩართული ახალი ადვოკატის მოთხოვნა გახდა, რომელმაც მასალების გასაცნობად დრო ითხოვა.
წინა სასამართლო პროცესი მას შემდეგ შეწყდა და გადაიდო, რაც მელნიკოვის ადვოკატმა მალხაზ ველიჯანაშვილმა აცილების საკითხი დააყენა. ადვოკატი მალხაზ ველიჯანაშვილი მელნიკოვის გარდა, იცავს აღნიშნულ საქმეზე ერთ-ერთ ეპიზოდზე ბრალდებულ ვალერიან მეტრეველს. ადვოკატმა განმარტა, რომ ვინაიდან მელნიკოვმა აღიარებითი ჩვენება მისცა, მისი ჩვენება ეწინააღმდეგება მისი დასაცავი პირის ინტერესებს და აქედან გამომდინარე, დადგა ადვოკატის აცილების საკითხი, რის გამოც პროცესი შეწყდა.
დღეს ბრალდებულს სახაზინო წესით დაუნიშნეს ადვოკატი, თუმცა პროცესზე გამოცხადდა ბრალდებულის ოჯახის მიერ წარმოდგენილი ადვოკატი, რის შემდეგაც ბრალდებულს სახაზინო ადვოკატი მოეხსნა.