ჟურნალისტი ეკა წამალაშვილი პროკურატურაში რუსეთის პრეზიდენტის ვლადიმირ პუტინის შეურაცხმყოფელი მაისურით მივიდა.
წამალაშვილი, რომელიც პროკურატურამ გადაცემა „მოდელირებული ქრონიკის" გამო დაიბარა აცხადებს, რომ მისთვის უცნობია, კონკრეტულად რა სახის კითხვები აქვთ სამართალდამცავებს.
"დამირეკეს და მითხრეს, რომ მთავარ პროკურატურაში აქვთ ჩემთან შეკითხვები, სურთ გასაუბრება მოდელირებული ქრონიკის გარშემო და მაშინ, საქართველოს გარეთ, გაურკვეველ საიტზე ატვირთულ გაურკვეველ ჩანაწერთან დაკავშირებით. მაინტერესებს, რას ეხება ეს შეკითხვები და მოვედი", - განაცხადა წამალაშვილმა.
მან მაისურთან დაკაბშირებით განმარტა, რომ ჟურნალისტების დაბარება ხდება პუტინის რუსეთში.
"ჟურნალისტების დაბარება ხდება პუტინის რუსეთში. მე არ მინდა და მწყინს, როცა ვხედავ, რომ ჩემი სამშობლო ემსგავსება პუტინის რუსეთის ფილიალს და ამის გასაპროტესტებლად მოვედი ამ მაისურით. ეს არის ჩემი პროტესტი, რომ ჩემი სამშობლო არ დაემსგავსოს პუტინის რუსეთს და ჟურნალისტებმა არ იარონ საგამოძიებო უწყებებში. ამიტომ გადავუხადე ბიძინა ივანიშვილსაც მადლობა, რადგან ჩავთვალე, რომ ჩემი დაბარება არის ერთგვარი დაბარება რიტორიკის გადაწყობის გაკვეთილზე", - განაცხადა წამალაშვილმა.
