არ ვარ დარწმუნებული, რომ სამინისტროს ხელმძღვანელობას წაკითხული აქვს იმ მედიკამენტების სრული სია, რომელზედაც 1 სექტემბრიდან ვრცელდება სარეცეპტო შეზღუდვა, - წერს ჯანდაცვის ყოფილი მინისტრი, პოლიტიკის ანალიზის ცენტრის წარმომადგენელი სანდრო ურუშაძე სტატიაში - "რატომ ვარ რეცეპტის მომხრე?", რომელიც "ივერია.ბიზ"-ზე გამოქვეყნდა.
ურუშაძე აცხადებს, რომ ის რჩება რეცეპტის ინსტიტუტის შენარჩუნების მხარდამჭერად, მაგრამ არა ამ ფორმით.
"არ ვარ დარწმუნებული, რომ სამინისტროს ხელმძღვანელობას წაკითხული აქვს იმ მედიკამენტების სრული სია, რომელზედაც 1 სექტემბრიდან ვრცელდება სარეცეპტო შეზღუდვა. ასევე დარწმუნებული ვარ, რომ ამ სიაში ცვლილებები ძალიან ფრთხილად და მხოლოდ იმ შემთხვევებში უნდა შევიდეს, როცა ამის საჭიროება იქნება. უახლოესი წარსულიდან ასეთი შემთხვევა იყო მედიკამენტი „ლირიკა" ", - წერს ურუშაძე და აღნიშნავს, რომ სამინისტროს ახალი ინიციატივა ამ სახით ხელს შეუწყობს რეცეპტის დისკრედიტაციას და არა პოპულარიზაციას.
მისივე თქმით, გამოცდილება ადასტურებს, რომ რეცეპტის შემოღება ვერ გადაწყვეტს ვერც არარაციონალური მედიკამენტოზური მკურნალობის, ვერც ექიმების პროფესიული განათლების პრობლემას და ვერც ფარმაცევტული კომპანიების მადას შეამცირებს. ამ ფორმით რეცეპტს დაქვემდებარებული მედიკამენტების სიის გაზრდა მხოლოდ კეთილსინდისიერ მყიდველს შეუქმნის ბარიერს.