აზერბაიჯანში შესვლაზე შეზღუდვები ამოქმედდა.
აზერბაიჯანის რესპუბლიკის ტერიტორიაზე ძალაში შევიდა ახალი რეგულაციები, რომლის მიხედვითაც ევრო 4 (EURO 4) სტანდარტის არმქონე ავტოსატრანსპორტო საშუალებები აზერბაიჯანის რესპუბლიკის ტერიტორიაზე დაიშვებიან მხოლოდ იმ შემთხვევაში, თუ მეპატრონე აზერბაიჯანის რესპუბლიკის საზღვრის კვეთისას შესაბამის ანგარიშზე შეიტანს ავტოსატრანსპორტო საშუალების ღირებულების 30%-დან 40%-მდე საგარანტიო თანხას. აღნიშნული თანხა მას მხოლოდ ქვეყნის ტერიტორიის დატოვების შემდეგ დაუბრუნდება.
ამასთან ერთად, კიდევ ერთი აუცილებელი პირობაა აზერბაიჯანის მოქალაქის წერილობითი თანხმობა, რომლითაც იგი იღებს პასუხისმგებლობას ევრო 4-ის სტანდარტის არმქონე ავტოსატრანსპორტო საშუალების ქვეყნის ტერიტორიაზე ყოფნის პერიოდში.
აღსანიშნავია, რომ აღნიშნული რეგულაცია ძალაში 1 აპრილს უნდა შესულიყო, თუმცა ქართული მხარის თხოვნით ვადამ გადაიწია.
აზერბაიჯანმა 2014 წლის იანვარში მიიღო კანონი "ევრო 4-ის" სტანდარტებზე გადასვლის თაობაზე, რომელიც გარკვეულ შეზღუდვებს აწესებს "ევრო 4-ის" არმქონე ავტომანქანების მიმოსვლაზე.