უკრაინის პრეზიდენტის ადმინისტრაციაში უკრაინის ტერიტორიაზე რუსეთის მხრიდან „ჰუმანიტარული ტვირთის" მიწოდების საბაბით, პირდაპირი სამხედრო აგრესიის განხორციელების შესაძლებლობას არ გამორიცხავენ. განცხადება ამის შესახებ რამდენიმე წუთის წინ კიევში პრეზიდენტის პრესმდივანმა სვიატოსლავ ცეგოლკომ გააკეთა.
მან განაცხადა, რომ დღეს მოვლენების განვითარების სამი სცენარი არსებობს. ერთ ერთი მათგანის მიხედვით, არსებობს უკრაინის ტერიტორიაზე ჰუმანიტარული ტვირთის შეტანის საბაბით პირდაპირი სამხედრო შეჭრის შესაძლებლობა.
მან აღნიშნა, რომ არც ერთი ცივილიზებული ქვეყანა არ ამბობს უარს ჰუმანიტარულ დახმარებაზე.
„ლუგანსკში, უკვე 11 დღეა ტერორისტების მოქმედების შედეგად არ არის შუქი , წყალი და წამლები. მთელი ამ დროის განმავლობაში უკრაინა ეძებს შესაძლებლობას ამ უკრაინულ ქალაქში დახმარება ჩაიტანოს",_ განაცხადა პრესმდივანმა და აღნიშნა, რომ ქალაქს ტერორისტები აკონტროლებენ და ისინი დახმარების ჩატანის შესაძლებლობას არ იძლევიან.
„პირველი სცენარია მიხედვით უკრაინის ტერიტორიაზე პირდაპირი შეჭრაა ჰუმანიტარული დახმარების ჩატანის საბაბით. მეორე - ტვირთთან დაკავშირებით პროვოკაციის განხორციელება ხარკოვის ოლქში შემოჭრის მაღალი ალბათობით და მესამე - ლუგანსკისათვის განკუთვნილი დახმარება გადის ამ უკრაინული ქალაქის ახლოს მდებარე საგუშაგოზე. ჩვენი მესაზღვრეები და ეუთოს წარმომადგენლები ტვირთის სკანირებას მოახდენენ რუსეთ-უკრაინის საზღვარზე. მისია ტერორისტების მიერ კონტროლირებად ტერიტორიაზე იმოძრავებს, ხოლო ქალაქში ჩასვლის შემდეგ კი ტვირთს მოსახლეობას შორის „წითელი ჯვრის" წარმომადგენლები დაანაწილებენ",_ განაცხადა ცეგოლკომ.
