ბათუმის რეფერალურ საავადმყოფოში სისხლის ბანკის გახსნას აჭარის ჯანდაცვის სამინისტროს წარმომადგენლები დაესწრნენ. სისხლის ბანკი იმუშავებს ამერიკული სისხლის ბანკების პრინციპით და მოემსახურება მხოლოდ უანგარო დონორებს, ადამიანებს, რომლებიც უსასყიდლოდ ჩააბარებენ სისხლს.
როგორც ბათუმის რეფერალური საავადმყოფოს ადმინისტრაციამ ჟურნალისტებთან საუბრისას აღნიშნა, სისხლის ბანკში დამზადებული პროდუქციით უზრუნველყოფილი იქნება აჭარის რეგიონი, რაც შესაბამისად წაადგება ქვეყანაში სისხლის მოთხოვნაზე არსებული დეფიციტის აღმოფხვრას.
სისხლის ბანკი აღჭურვილია უახლესი აპარატურა-დანადგარებით, რომელთა მეშვეობითაც შესაძლებელია დამზადდეს უსაფრთხო ევროპული სტანდარტების სისხლის კომპონენტები. გამოკვლევების ერთი ნაწილი უტარდება თავად დონორს, ხოლო მეორე ნაწილი უშუალოდ დონორულ სისხლს. დონორებისთვის ხდება ჯგუფის, რეზუსის და ჰემოგლობინის მაჩვენებლების განსაზღვრა, ხოლო დონაციის შემდეგ უახლესი ლაბორატორიული მეთოდებით სისხლი გადის ვირუსულ ინფექციებზე კონტროლს.
სისხლის კომპონენტების დამზადების პროცესი დახურულ, გარემოსგან სრულად დაცულ ციკლს გაივლის, ეს კი დამზადებული პროდუქციის მაღალი ხარისხის გარანტიაა.
