6 აგვისტოს, 13:00 საათზე, მრგვალ ბაღში, საქართველოში გაეროს ოფისის წინ, საქართველოში მცხოვრები ეთნიკური და რელიგიური ჯგუფების წარმომადგენლების მონაწილეობით გაიმართება მშვიდობიანი აქცია ერაყის ჩრდილოეთში, სინჯარის რეგიონში ეზიდების მასობრივი დევნისა და შევიწროების დაგმობისა და მშვიდობის უზრუნველყოფის მოთხოვნის მიზნით.
„საქართველოს ეზიდთა სახლის" წარმომადგენლები შეშფოთებას გამოთქვამენ ერაყის ჩრდილოეთში, სინჯარის რეგიონში ბოლო დროს განვითარებული მოვლენების გამო. როგორც საზოგადოებისთვის ცნობილია ამ რეგიონში ცხოვრობს ეზიდთა უმრავლესობა.
2014 წლის 3 აგვისტოს, ე.წ. „ისლამის სახელმწიფოს" ტერორისტებმა მუხანათურად დაიკავეს სინჯარი და ადგილობრივი მოსახლების გენოციდს ახორციელებენ, ამას ადასტურებენ საინფორმაციო წყაროები და საერთაშორისო ორიგანიზაციების წარმომადგენლები.
ამჟამად არსებული მონაცემებით უკვე 200 000-ზე მეტი ადგილობრივი მოსახლე, მათ შორის ქალები და ბავშვები, გახდა დევნის მსხვერპლი. ისინი ქვეყნის ჩრდილოეთი რაიონებისკენ დაიძრნენ. ცალსახაა, რომ ჰუმანიტარული კატასტროფა გარდაუვალია.
„საქართველოს ეზიდთა სახლი" მიმართავს მსოფლიო ლიდერებს, საერთაშორისო ორგანიზაციებს დახმარება აღმოუჩინონ მშვიდობიან ეზიდ მოსახლეობას. დღეს სინჯარში მთელი რეგიონის მშვიდობის საკითხი წყდება. რეგიონში სტაბილურობის შესანარჩუნებლად ყველეა ღონე უნდა ვიხმაროთ.
იმედი გვაქვს, ჩვენი თხოვნა შესმენილი იქნება და არ დაგვჭირდება ფართომასშტაბიანი დემონსტარციების გამართვა.