როგორც ცნობილია, „ებოლა" არის იშვიათი, მაგრამ სასიკვდილო ვირუსი, რომელიც ძირითადად ვრცელდება დასავლეთ, ან ცენტრალური აფრიკაში. დაავადების შემთხვევები გვხვდება ადამიანებში და პრიმატებში (მაიმუნი).
„ებოლას" ვირუსის ბუნებრივი რეზერვუარი უცნობია, თუმცა გავრცელებული ინფორმაციის თანახმად, ადამიანი ინფიცირდება დაავადებულ ცხოველთან, ან ადამიანთან კონტაქტით და სისხლით. ხშირია ინფექციის საავადმყოფოებში გავრცელების შემთხვევები.
ვირუსის სიმპტომები 2-დან 21 დღემდე ვითარდება. პაციენტს ახასიათებს მაღალი ტემპერატურა, თავისა და ყელის ტკივილი, სისუსტე, ტკივილი მუცლის არეში, გარეგანი და შინაგანი სისხლჩაქცევები სხეულზე.
სამწუხაროდ „ებოლას" წინააღმდეგ ვაქცინა არ არსებობს, მაგრამ შემუშავებულია მკურნალობის სხვადასხვა მეთოდი, როგორიცაა ინტრავენური გზით სხვადასხვა პრეპარატების გადასხმა, ასევე ჟანგბადის მიწოდება და რაციონალური კვება. უსაფრთხოების დაცვის მიზნით სამედიცინო წარმომადგენლები დაავადებულებთან მხოლოდ პირბადის, ხელთათმანისა და სათვალის გამოყენებით კონტაქტობენ.
„ებოლას" ცხელება პირველად 1976 წელს გამოვლინდა კონგოს რესპუბლიკაში მდინარე „ებოლთან". სწორედ აქედან წარმოიშვა ვირუსის სახელწოდება. დაავადებას მძიმე შედეგები დღემდე მოყვება.
2014 წლის 23 ივლისის მონაცემების მიხედვით, 1200-მდე დაავადებულთაგან 700-მდე სამწუხაროდ ფატალური შემთხვევით დამთავრდა. სხვადასხვა ორგანიზაციები, როგორიცაა აშშ-ს დაავადებათა კონტროლის ცენტრი, დასავლეთ აფრიკის ქვეყნების ეკონომიკური გაერთიანება, ევრო კომისია და წითელი ჯვარი, მობილიზაციას უკეთებენ პერსონალს და გამოყოფენ ფონდებს დაავადების აღმოსაფხვრელად.
„ებოლასაგან" თავის დასაცავად საჭიროა რამდენიმე წესის დაცვა:
• უპირველეს ყოვლისა თავის შეკავება იმ ქვეყნებში მოგზაურობისგან, სადაც ვირუსია გავრცელებული. ბოლო მონაცემების მიხედვით ეს ქვეყნებია: ნიგერია, ლიბერია, გვინეა, სიერა-ლეონე. ასევე პერიოდულად ვრცელდება ვირუსი კონგოს რესპუბლიკაში.
• ხშირად ხელების დაბანა. თუ საპონი და წყალი არ მოიძებნა მაშინ დაბანა შესაძლებელია 60% სპირტის შემცვლელი ალკოჰოლით.
• დაავადებულ პირებთან ან ცხოველებთან დაუშვებელია კონტაქტი; ასევე არავითარ შემთხვევაში არ შეიძლება შეხება „ებოლას" ვირუსით გარდაცვლილებთან.
• იმ შემთხვევაში, თუ კონტაქტი გარდაუვალია, მაშინ აუცილებლად გამოიყენეთ სამედიცინო ნიღაბი, ხელთათმანი და სათვალე.
• არ არის მიზანშეწონილი გარეული ცხოველის ხორცის ყიდვა/ჭამა, განსაკუთრებით განვითარებადი ქვეყნების ადგილობრივ მაღაზიებში.