სახალხო დამცველი უჩა ნანუაშვილი რეგიონებში ვიზიტს განაგრძობს. უჩა ნანუაშვილმა შეხვედრები გამართა ჩარგალში, ბარისახოსა და შატილში, სადაც მოსახლეობის ძირითად პრობლემას გზების ინფრასტრუქტურა, ჯანდაცვაზე ხელმისაწვდომობა და კომუნიკაციების გაუმართავობა წარმოადგენს. როგორც ,,ჯი-ეიჩ-ენს" სახალხო დამცველის აპარატიდან აცნობეს რამდენიმე სოფელში არ არის სამანქანო გზა. შატილში უკვე რამდენიმე წელია აღარ დაფრინავს ვერტმფრენი, რის გამოც ზამთრის პერიოდში ხევსურეთი სრულიად მოწყვეტილია დანარჩენ საქართველოს.
ფშავში არ არის აფთიაქი, ხოლო ამბულატორია, რომელიც მაღაროსკარში მდებარეობს 17 სოფელს ემსახურება. რეგიონში მხოლოდ ერთი ექიმია, რომელიც შესაბამისი ტრანსპორტის უქონლობის გამო რიგ სოფლებში მისვლას ვერ ახერხებს.
ამორტიზებულ მდგომარეობაშია ბარისახოს საჯარო სკოლის შენობაც, სადაც არ არის შესაბამისი ინვენტარი. სასწავლო დაწესებულება სახალხო დამცველის შეფასებით არ შეესაბამება სტანდარტებს. სარემონტოა ასევე ჩარგალში არსებული მუზეუმი.
რიგ სოფლებს არ მიეწოდება ელექტროენერგია, პრობლემებია ასევე კომუნიკაციასთან დაკავშირებით. პრობლემას წარმოადგენს სასმელი წყალიც. კვირაობით ვერ ხერხდება ნაგვის გატანა. არ არის ინტერნეტი, ამ დრომდე არ არის გაზიფიცირებული სოფლები.
კვლავ პრობლემად რჩება დასაქმება, რის გამოც თანდათან სოფლები იცლება, განსაკუთრებით მწვავედ ეს პრობლემა საზღვრისპირა სოფლებში დგას.
სახალხო დამცველი აუცილებლად მიიჩნევს მთიან რეგიონებში დაუყოვნებლივ იქნას მიღებული მთის კანონი. ომბუდსმენი ასევე მიმართავს ჯანდაცვის, ენერგეტიკის, ინფრასტრუქტურისა და განათლების სამინისტროებს დაინტერესდნენ ფშავ-ხევსურეთში არსებული მდგომარეობით.