ნიგერიაში დაკავებული გემის ეკიპაჟის წევრები კვლავ გაუსაძლის პირობებში იმყოფებიან. აჭარის ტელევიზიის ინფორმაციით, კაპიტნის რეზო ქათამაძის ოჯახი საზღვაო სატრანსპორტო სააგენტოში იმყოფებოდა, სადაც 23 ივლისს დახმარების თხოვნით წერილი შეიტანეს. კაპიტნის შვილი ირაკლი ქათამაძე ამბობს, რომ ამ დრომდე მათ არც ერთი უწყებიდან არ დაკავშირებიათ. გემზე კვლავ არ აქვთ საკვები და წყალი, მეზღვაურებს არც ხელფასი აუღიათ.
ტელევიზია იუწყება, რომ საზღვაო ტრანსპორტის ადმინისტრიაში ქართველი მეზღვაურების შესახებ ინფორმაცია ყველა უწყებას აქვს, მაგრამ ამ ეტაპზე სიახლე არ არის. ნიგერიის პორტ ჰარკოტში პანამის დროშის ქვეშ მცურავი გემი და მისი ეკიპაჟი 6 თვეა დაკავებულია. გემზე სამი ბათუმელი მეზღვაურია. ხომალდის დაკავების მიზეზი გემზე აღმოჩენილი კონტეინერია, რომელშიც სამხედრო დანიშნულების იარაღი იყო.
