"საქართველოს ბანკის" დაფინანსებით, შეზღუდული შესაძლებლობის მქონე პირთათვის თბილისის რამდენიმე საკვანძო გამზირისა და ქუჩის ადაპტაცია განხორციელდება. როგორც „საქართველოს ბანკის" გენერალურმა დირექტორმა ირაკლი გილაურმა განმარტა, ხსენებული პროექტის ფარგლებში ჭავჭავაძის, მელიქიშვილის, პეკინისა და ყაზბეგის გამზირების, ასევე კოსტავას, შარტავას, ჯიქიას, ქავთარაძისა და ჩოლოყაშვილის ქუჩების ტროტუარები სრულად ადაპტირდება შშმ პირებისათვის. პროექტი მიმდინარე წლის 15 ნოემბრამდე დასრულდება და ჯამში 650 პანდუსი დამონტაჟდება, რისთვისაც „საქართველოს ბანკმა" თითქმის 200 ათასი ლარი დახარჯა.
ირაკლი გილაურის განმარტებით, პროექტი, „სიცოცხლის ხის" საშუალებით ხორციელდება და პანდუსების მოწყობა მთლიანად ევროსტანდარტების შესაბამისად მოხდება. ევროსტანდარტების მიხედვით კი პანდუსის დახრილობის კუთხემ 5-დან 8 გრადუსამდე უნდა შეადგინოს.
უკვე ცნობილია, რომ თბილისის გამზირებისა და ქუჩების პანდუსებით აღჭურვის პროცესში ჩაერთვებიან ეტლით მოსარგებლე მოქალაქეები.
პროექტის განხორციელებას კოორდინაციას უწევს ფონდი "სიცოცხლის ხე", ინიციატივა კი ეკუთვნის ორგანიზაციას "სოცკოდექსი", რომელიც "საქართველოს ბანკს" თავისი 500 მოხალისით ეხმარება
როგორც სიცოცხლის ხის ხელმძღვანელი თორნიკე გურული აცხადებს.,ხშირია შემთხვევები, როდესაც მოქალაქეები საკუთარ ავტომობილებს პანდუსებზე აჩერებენ, რის გამოც შეზღუდული შესაძლებლობის მქონე პირები პანდუსებით სარგებლობას ვეღარ ახერხებენ. გურულის განმარტებით, აღნიშნული პროცესი აზიანებს ასევე ინფრასტრუქტურას და ის შშმ პირების გადაადგილებისათვის არახელსაყრელი ხდება.
