რაჭის ყოფილი გუბერნატორი და ამჟამად "ერთიანი ნაციონალური მოძრაობის" რაჭა ლეჩხუმისა და ქვემო სვანეთის კურატორი ოთარ სირაძე, მისი ქონების შესახებ გავრცელებულ ინფორმაციას ეხმიანება და აცხადებს, რომ მისი ქონება შემოიფარგლება ამბროლაურში მდებარე სახლით, ავტომობილით და თბილისში მშენებარე ბინით.
ოთარ სირაძე მისი "გრანდიოზული" ქონებისა და წილების შესახებ გავრცელებულ ინფორმაციას უარყოფს და განმარტავს, რომ არ ფლობს წილს არც ამბროლაურში მდებარე სასტუმრო "სილოვანში" და არც რაჭის ფილარმონიად წოდებულ - ახალ სავაჭრო ცენტრში. ასევე არ შეუსყიდია ამბროლაურის კინოთეატრი.
"არ მაქვს და არც მქონია წილი ამბროლაურის საგზაო კომპანიაში, ასევე შპს "ამბროლაურ გაზში", არ ვფლობ წილს რესტორან "ოჩამჩირეში" თბილისში და ა.შ.
მოკლედ არასდროს არანაირი უძრავი ქონება არ შემისყიდია და შესაბამისად არანაირი წილების მფლობელი არც ახლა და არც ადრე მე არ ვყოფილვარ"- განმარტავს სოციალური ქსელის საშუალებით, ოთარ სირაძე.
რაჭის ყოფილი გუბერნატორი ოპონენტებსაც მიმართავს და აცხადებს, რომ "გეყოთ სინდისი და ნამუსი - ვინც ამ თემებით წლებია სპეკულირებთ და საქმეს მიხედეთ, ძალიან მარტივია ამის გადამოწმება, მათთვის ვისთვისაც მართლა საინტერესოა, რომ მოვიხვეჭე თუ არა ქონება ჩემი გუბერნატორად მუშაობის პერიოდში. საჯაროა საჯარო რეესტრის ინფორმაცია და ყველას შეუძლია ამის გადამოწმება. ყველა ჩამოთვლილი ობიექტების მეპატრონეები დღეს, ან წარმოადგენენ "ქართულ ოცნებას", ან მათთან დაახლოებული და მხარდამჭერი პირები არიან. ამიტომ ვურჩევდი ჯერ მათთან გადაემოწმებინათ".
ოთარ სირაძის ინფორმაციით, მისთვის გასაგებია თუ რატომ ხდებოდა ამ ჭორების გავრცელება იმ დროს, როცა ის გუბერნატორი იყო, რადგანაც სასტუმრო, სავაჭრო ცენტრი და ბევრი სხვა ობიექტი მისი ხელშეწყობით აშენდა.
"ცხადია მაშინ ამას ყურადღებას არ ვაქცევდი, მთავარი იყო საქმე კეთდებოდა და რეგიონი ვითარდებოდა. სიმართლე იცოდა ბევრმა გარშემო, ასევე მოხდა "ამბროლაურ გაზზეც", როდესაც 20 წლიანი პაუზის შემდეგ, ამბროლაურში გაზის მილსადენი აღვადგინე და ქალაქის გაზიფიცირება მოვახდინე, მოკლედ თუ კი რამე სიკეთე მოყვა ჩემს იქ მუშაობას ადამიანების ჯგუფს დღემდე ვერ წარმოუდგენია, თუ ეს ჩემი პირადი ინტერესის, ან გამორჩენის გამო არ გამიკეთებია. არადა ყველაზე დიდი სიმდიდრე ზუსტად ესაა ჩემთვის, როდესაც დავდივარ ჩემს შვილებთან, ან სტუმრებთან ერთად, ამბროლაურის, ონის ქუჩებში, განათებულ გალამაზებულ შენობებს ვუყურებ და ყველა შენობასთან დაკავშირებით ჩემი ისტორია მაქვს და მათ ვუყვები, ვუზიარებ და ამით უზომოდ ბედნიერი ვარ, რომ მე შევქმენი ჩემს მეგობრებთან ერთად ეს ყველაფერი. ცხადია გასაკეთებელი ჯერ კიდევ ბევრია და უკვე ზუსტად ვიცი, რომ ის სამუშაოები ჩვენ გველოდება, რადგანაც ჯერ მათი გამკეთებელი არავინაა"- აცხადებს სირაძე.
როგორც რაჭის ყოფილი გუბერნატორი განმარტავს, მისი ქონება შედგება: ამბროლაურში მდებარე სახლისგან, რომელიც 2005 წელს 1 6,800ლარად იყიდა და არა 2 ლარად. ასევე 2003 წელს გამოშვებული ავტომობილ BMW745-გან და თბილისში124 კვ/მ ფართი ბინისგან, რომელის მშენებლობაც გეგმის მიხედვით 2016 წელს უნდა დასრულდეს.
