კონფლიქტებისა და მოლაპარაკებების საერთაშორისო კვლევითი ცენტრის დამაარსებელს, პროფესორ გიორგი ხუციშვილს „მშვიდობისა და თანხმობის დამცველის" მედალი გარდაცვალების შემდეგ მიენიჭა. ჯილდო, როგორც საზოგადოებრივი აღიარება ორ ქვეყანას შორის მშვიდობისა და თანხმობის მშენებლობის საქმეში შეტანილი წვლისისთვის, გოგი ხუციშვილის მეუღლეს ნინო ციხისთავი-ხუციშვილს გადაეცა. ჯილდოს გადაცემის ცერემონიალი ქართულ-რუსული არასამთავრობო ორგანიზაციების მე-2 ფორუმზე, სასტუმრო „ძველ თბილისში" გაიმართა.
გიორგი ხუციშვილი (1948-2013) მეცნიერი, ფილოსოფოსი, კონფლიქტოლოგი, საზოგადო მოღვაწე; 1994 წელს დააარსა დამოუკიდებელი ორგანიზაცია კონფლიქტებისა და მოლაპარაკებების საერთაშორისო კვლევითი ცენტრი (ICCN), 1995-2013 წლებში გამოსცემდა ჟურნალებს: „დრო მშვიდობისა", „კონფლიქტები და მოლაპარაკებები", „კონფლიქტის ალტერნატივა" და სხვა. წლების მანძილზე იგი მიწვეული იყო და პროფესორად მუშაობდა საქართველოსა და მსოფლიოს სხვადასხვა უნივერსიტეტში. გიორგი ხუციშვილმა მნიშვნელოვანი წვლილი შეიტანა თეორიული აზროვნებისა და უსასრულობის არსის კვლევაში ფილოსოფიისა და მათემატიკის ურთიერთმიმართების საფუძველზე (1970-1980-იანი წლები). კონფლიქტებისა და მშვიდობის მეცნიერების დარგის საქართველოში დამკვიდრებასა და განვითარებას იგი 1990-იანი წლებიდან სიცოცოხლის ბოლომდე ემსახურებოდა.
