მზის ზედაპირზე ერთი შავი ლაქაც არ ჩანს, რაც მეცნიერების შეშფოთებას იწვევს. ლაქები მზის ზედაპირიდან რამდენიმე დღეა რა გაქრა და ეს იმის მიუხედავად, რომ ის 11 წლიანი მზის აქტივობის ციკლის შუა პერიოდში იმყოფება, წერს The Daily Mail.
მზეზე შავი ლაქები იმ ადგილებში ჩნდება, სადაც მაღალი მაგნიტური აქტივობაა. ეს შეიძლება იყოს აფეთქებები, ან კორონალური მასის ამოფრქვევა, რის შედეგადაც თავისუფლდება ენერგია. რით არის გამოწვეული ამჟამინდელი მდგომარეობა, მით უფრო მაგნიტური აქტივობის პერიოდში, მეცნიერებისთვის გაურკვეველია.
ზოგიერთი სპეციალისტი მიიჩნევს, რომ შავი ლაქების „გაქრობა" მოსალოდნელი იყო და ეს მხოლოდ „დროებითი ანტრაქტია". მაგალითად 2011 წლის 14 აგვისტოს მზეზე არც ერთი შავი ლაქა არ შეიმჩნეოდა, თუმცა მთელი წელი საკმაოდ გამოირჩეოდა სერიოზული მზის აქტივობებით. მზის ფიზიკის სფეროს სპეციალისტი ტონი ფილიფსი აცხადებს, რომ არსებული ვითარება კიდევ ერთხელ ადასტურებს - „მეცნიერებმა ჯერაც არ იციან მზის არსი კონკრეტულად ის თუ რა ხდება მზეზე და არ შეუძლიათ მისი აქტივობის წინასწარ განსაზღვრა".
მზის ლაქები წარმოადგენს მზის მაგნიტური აქტივობის მთავარ მაჩვენებლებს. შავ ადგილებში ტემპერატურა უფრო დაბალია, ვიდრე მის ირგვლივ არსებულ ფოტოსფეროში.
