ინფორმაციის თავისუფლების განვითარების ინსტიტუტი (IDFI) სასჯელაღსრულების მინისტრობის კანდიდატის გიორგი მღებრიშვილის შესახებ მისი გუბერნატორის თანამდებობაზე ყოფნის დროს მიღებულ საჯარო ინფორმაციას აქვეყნებს.
ორგანიზაციის ინფორმაციით, 2014 წლის 4 აპრილს IDFI - იმ ქვემო ქართლის გუბერნატორის ადმინისტრაციას მიმართა სხვადასხვა შინაარსის საჯარო ინფორმაციის მოთხოვნის წერილით. ადმინისტრაციის მიერ არასრულყოფილადაა წარმოდგენილი მხოლოდ 2013 წლის ბიუჯეტის შესრულების ანგარიში, სხვა მოთხოვნებზე მიღებული პასუხი სრულყოფილია.
IDFI-ის ცნობით, როგორც მიღებული დოკუმენტაციიდან ირკვევა 2013 წელს ადმინისტრაციის თანამშრომლებზე პრემიის სახით სულ გაიცა 95 550 ლარის ოდენობის პრემია, საიდანაც გუბერნატორის მოადგილეებს მიღებული აქვთ 20 700 ლარი. 2013 წელს ქვემო ქართლის გუბრენატორს პრემია არ მიუღია.
ქვემო ქართლის გუბერნატორის ადმინისტრაციის ბალანსზე ირიცხება 5 ავტომობილი. აღნიშნული ავტომობილებიდან ყველაზე ძვირადღირებულია (შესყიდვის ფასი 72 897 ლარი) 2008 წელს გამოშვებული ტოიოტა ლენდ კრუიზერი, რომელიც თხოვების ხელშეკრულებით გადაცემულია წალკის მუნიციპალიტეტის გამგეობაზე.
ხოლო ორგანიზაციისთვის მოწოდებული ინფორმაციის მიხედვით, 2014 წლის მარტის თვეში ქვემო ქართლის გუბერნატორს გიორგი მღებრიშვილს ელექტრონული ფოსტიდან სამსახურებრივ საქმიანობასთან დაკავშირებით მიმოწერა არ ქონია.
ამასთან, როგორც ირკვევა 2013 წელს გუბერნატორის ადმინისტრაციის მიერ არ გაცემულა სახელფასო დანამატები, არ გაწეულა წარმომადგენლობითი ხარჯები, არ განხორციელებულა გადაუდებელი აუცილებლობით განპირობებული სახელმწიფო შესყიდვები და ადმინისტრაციაში არ განხორციელებულა არანაირი სახის აუდიტორული შემოწმება.

შეგახსენებთ, რომ გუშინ საქართველოს პრემიერ-მინისტრმა სასჯელაღსრულებისა და პრობაციის მინისტრის კანდიდატად წარადგინა ქვემო ქართლის ყოფილი გუბერნატორი გიორგი მღებრიშვილი.