ბათუმში, სასტუმრო ,,შერატონ ბათუმში" მიმდინარე საერთაშორისო საპარლამენტო კონფერენციამ ,,საქართველოს შემდგომი ნაბიჯები ევროკავშირისკენ: ვიშეგრადის ჯგუფის წევრი სახელმწიფოების საპარლამენტო გამოცდილება" საქართველოს პარლამენტის ევროპასთან ინტეგრაციის კომიტეტისა და ვიშეგრადის ჯგუფის პარლამენტების ევროპულ საქმეთა კომიტეტების ერთობლივი განცხადება მიიღო.როგორც ,,ჯი-ეიჩ-ენს" პარლამენტიდან აცნობეს განცხადებაში აღნიშნულია საქართველოში განხორციელებული წარმატებული რეფორმების მნიშვნელობა ქვეყნის მომავალი განვითარებისათვის.
საუბარია საქართველოს პარლამენტსა და ვიშეგრადის ჯგუფის ქვეყნების პარლამენტებს შორის თანამშრომლობის მნიშვნელობაზე. განცხადებაში მხარეები მხარს უჭერენ ვიშეგრადის ჯგუფის და საქართველოს პარლამენტის ევროპულ საქმეთა კომიტეტების რეგულარულ ყოველწლიურ შეხვედრებს პოლიტიკური დიალოგის ინტენსიურობის გაზრდისა და ერთობლივი ინტერესის საკითხების განხილვის მიზნით, ასევე აღიარებენ, რომ ევროკავშირთან ასოცირების შეთანხმების ხელმოწერისა და რატიფიკაციის შემდეგ, საქართველოს პარლამენტმა უფრო ინტენსიურად უნდა ითანამშრომლოს ევროკავშირის წევრი სახელმწიფოების პარლამენტებთან, განსაკუთრებით კი ვიშეგრადის ჯგუფის პარლამენტებთან, ევროპული ინტეგრაციის სფეროში ინსტიტუციონალური ცოდნისა და გამოცდილების გაზიარების, ასოცირების შეთანხმების განხორციელების, კანონმდებლობის ჰარმონიზაციის, მთავრობაზე ზედამხედველობის, საზოგადოებასთან ურთიერთობისა და საზოგადოებრივი ცნობიერების ამაღლების მიზნით.
დოკუმენტში ხაზგასმითაა აღნიშნული, რომ ხელმომწერი ქვეყნები გამოხატავენ მზაობას შეიმუშავონ ახალი პლატფორმები და თანამშრომლობის ინსტრუმენტები საპარლამენტო დიალოგის ინტენსიურობის გაზრდისა და ევროპული ინტეგრაციის საკითხებზე გამოცდილების გაზიარებისათვის საქართველოს ევროკავშირში სრულუფლებიანი წევრობის მისაღწევად.
ერთობლივ განცხადებაში განსაკუთრებული ყურადღებაა გამახვილებული ვიზების ლიბერალიზაციის საკითხზე და ნათქვამია, რომ მხარეები მხარს უჭერენ პროგრესის სათანადოდ შეფასებას მიღწეულს „სავიზო ლიბერალიზაციის სამოქმედო გეგმის" ასპექტში და შესაბამისი გადაწყვეტილების გამოცხადებას საქართველოსათვის თავისუფალი სავიზო რეჟიმის მინიჭების თაობაზე „რიგის აღმოსავლეთ პარტნიორობის სამიტზე".
დოკუმენტს ხელი მოაწერეს: საქართველოს პარლამენტის ევროპასთან ინტეგრაციის კომიტეტის სახელით, ვიქტორ დოლიძემ, ჩეხეთის რესპუბლიკის პარლამენტის ევროკავშირის საკითხთა კომიტეტის სახელით, მიროსლავ კრეიცამ, უნგრეთის ეროვნული ასამბლეის ევროპულ საქმეთა კომიტეტის სახელით, ზოლტან ტესელმა, პოლონეთის პარლამენტის სენატის ევროპულ საქმეთა კომიტეტის სახელით, ედმუნდ ვიტბროდტმა, სლოვაკეთის რესპუბლიკის პარლამენტის ევროპულ საქმეთა კომიტეტის სახელით, ანდრეი კოლესიკმა.
