სახალხო დამცველმა უჩა ნანუაშვილმა პარლამენტს წარუდგინა საკანონმდებლო წინადადება „საქართველოს სახალხო დამცველის შესახებ" საქართველოს ორგანულ კანონში ცვლილებების თაობაზე. აღნიშნული ცვლილებები ეხება პრევენციის ეროვნული მექანიზმისთვის ფოტო და ვიდეო გადაღების უფლების მინიჭებას.როგორც ,,ჯი-ეიჩ-ენს" სახალხო დამცველის აპარატიდან აცნობეს პრევენციის ეროვნული მექანიზმისთვის ფოტო და ვიდეო გადაღების უფლების მინიჭების აუცილებლობაზე საქართველოს სახალხო დამცველის 2013 წლის ანგარიშშიცაა საუბარი.
საქართველოს სახალხო დამცველი მიიჩნევს, რომ პრევენციის ეროვნული მექანიზმის ფუნქციების ჯეროვანი შესრულებისთვის ზემოაღნიშნული უფლებამოსილების მინიჭება მნიშვნელოვანია, რამდენადაც წარსულში, როგორც წესი, ჯგუფის მიერ დოკუმენტირებული წამების და არაადამიანური მოპყრობის ფაქტების სათანადო გამოძიება არ ხდებოდა, ხოლო მიზეზად მტკიცებულებათა ნაკლებობა სახელდებოდა. გარდა ამისა, არსებითი მნიშვნელობა აქვს პრევენციის ეროვნული მექანიზმისთვის იმგვარი კომპეტენციის მინიჭებას, რომელიც, ერთი მხრივ, ხელს შეუწყობს თავისუფლების აღკვეთის, დაკავებისა და თავისუფლების შეზღუდვის სხვა ადგილებში წამების და არასათანადო მოპყრობის შემთხვევების ეფექტურ გამოძიებას, ხოლო მეორე მხრივ, საქართველოს სახალხო დამცველს საშუალებას მისცემს უფრო ეფექტურად განახორციელოს პრევენციის ეროვნული მექანიზმის ფუნქციები.
პრევენციის ეროვნული მექანიზმის მიერ მონიტორინგის განხორციელების პროცესში ფოტო და ვიდეო გადაღების პრაქტიკა ევროპის მრავალ ქვეყანაში წარმატებით ფუნქციონირებს. მათ შორის, ჩეხეთში, გერმანიაში, პოლონეთში, ლუქსემბურგში, სერბეთში, სლოვენიაში, შვედეთში, მაკედონიაში და სხვა. რეგულირებები განსხვავებულია ქვეყნების მიხედვით, მაგრამ უმეტეს შემთხვევაში სპეციალური პრევენციული ჯგუფის წევრებს აქვთ ფოტო და ვიდეო კამერის შეტანის უფლება და ადგილზე გადაღების საშუალება დაბრკოლების გარეშე.
საქართველოს სახალხო დამცველი მიიჩნევს, რომ აღნიშნული ცვლილება წინგადადგმული ნაბიჯი იქნება თავისუფლებაშეზღუდულ პირთა უფლებათა დაცვისა და წამებისა და არაადამიანური მოპყრობის დანაშაულის ეფექტური გამოძიების თვალსაზრისით. ეს უფლებამოსილება პრევენციის ეროვნულ მექანიზმს საშუალებას მისცემს დააფიქსიროს თითოეული შემთხვევა და ჰქონდეს მყარი მტკიცებულებები. აქედან გამომდინარე, სახალხო დამცველი იმედოვნებს, რომ საქართველოს პარლამენტი დაყოვნების გარეშე მიიღებს „საქართველოს სახალხო დამცველის შესახებ" საქართველოს ორგანულ კანონში შეთავაზებული ცვლილებების პროექტს.
