"წყალი მარგებელის" მხარდაჭერით 15-19 ივლისს, თბილისში რიგით მეხუთე Kavkaz Jazz Festival გაიმართა.
ფესტივალის პროგრამა ტრადიციულად დამწყები ჯაზ-მუსიკოსებისთვის მასტერ-კლასებისგან, ყოველდღიური კონცერტებისგან და ჯემ-სეიშენებისგან შედგებოდა. კონცერტებში ქართველ მუსიკოსებთან ერთად სომხეთიდან, აზერბაიჯანიდან და პოლონეთიდან მოწვეული სტუმრებიც მონაწილეობდნენ.
წელს პირველად ფესტივალმა"მრგვალი მაგიდების" სერიას უმასპინძლა, სადაც სამხრეთ კავკასიის წამყვანმა ექსპერტებმა, კულტურის მენეჯერებმა და არტ-კრიტიკოსებმა რეგიონულ მუსიკალურ ბაზარზე შექმნილ პრობლემებსა და მათი გადაჭრის გზებზე იმსჯელეს.
„ჩვენი კომპანიისთვის ყოველთვის მნიშვნელოვანი იყო ისეთი კულტურული ღონისძიებების მხარდაჭერა, რომლებიც სხვადასხვა ქვეყნისა და კულტურის წარმომადგენლებს ერთ სივრცეში მოაქცევდა და შეუწყობდა ხელს დარგში არსებული პრობლემების შესახებ მსჯელობასა და გაანალიზებას. ამიტომაც სიამოვნებით დავთანხმდით ორგანიზატორების შემოთავაზებას და ჩავერთეთ წლის ერთ-ერთ მნიშვნელოვან კულტურულ მოვლენაში. „წყალი მარგებელისთვის" სასიხარულოა, რომ Kavkaz Jazz Festival-ის საშუალებით შესაძლებლობა მიეცა ხელი შეუწყოს ჟანრში ახალი ნიჭიერი მუსიკოსების აღმოჩენასა და მათ შემდგომ წინსვლას. ვიმედოვნებთ, რომ ჩვენი თანამშრომლობა მომავალშიც გაგრძელდება,"- აცხადებს კომპანიის საზოგადოებასთან ურთიერთობის სამსახურის ხელმძღვანელი ვიქტორია ჟიჟკო.
Kavkaz Jazz ერთადერთი არაკომერციული ჯაზ-ფესტივალია საქართველოში, რომელიც საგანმანათლებლო ხასიათს ატარებს. ფესტივალის მიზანია სამხრეთ კავკასიაში ხელი შეუწყოს ჯაზის განვითარებას, შემსრულებლებს შორის კულტურულ დიალოგსა და მათ მეგობრულ დაახლოებას, რაც ასევე მათ შემდგომ თანამშრომლობას უწყობს ხელს. Kavkaz Jazz ფესტივალი ტარდება 2010 წლიდან. ამ პეროდის განმავლობაში ფესტივალში 50-მდე მუსიკოსმა მიიღო მონაწილეობა.
TOP.GE