21 ივლისს, საჯარო რეესტრის ეროვნულ სააგენტოში ავსტრიელი ექსპერტების სამუშაო ვიზიტი დაიწყო. ექსპერტები შეხვედრებს გამართავენ ეროვნული სივრცითი მონაცემების ინფრასტრუქტურის (NSDI) შექმნისა და განვითარების სამთავრობო კომისიის სამუშაო თემატურ ჯგუფების წარმომადგენლებთან.
შეხვედრებზე განიხილავენ ეროვნული სივრცითი მონაცემების ინფრასტრუქტურის შექმნის სამოქმედო დოკუმენტს და პროექტის ფარგლებში დაგეგმილ კონკრეტულ საქმიანობებს შეაფასებენ. გაიმართება დისკუსია საქართველოში სივრცითი მონაცემების ინფრასტრუქტურის განვითარების შესაძლებლობების და სამომავლო გამოწვევების შესახებ.
საჯარო რეესტრის წარმომადგენლები წარადგენენ NSDI -ის საპილოტე პროექტს, რომელიც ქალაქ გორში მიმდინარე წელს განხორციელდება.
ვიზიტის დასასრულს, გაიმართება შემაჯამებელი შეხვედრა დაინტერესებულ მხარეებთან. ინფორმაციული ტექნოლოგიებისა და გეოინფორმაციული სისტემების ქართველი სპეციალისტების მოსაზრებები პროექტის საბოლოო ანგარიშშიც აისახება, რომელსაც მოწვეული ექსპერტები ახლო მომავალში მოამზადებენ.
ავსტრიელი ექსპერტების ვიზიტი ევროკავშირის დაძმობილების (twinning) პროექტის - „ელექტრონული მმართველობის განვითარება საქართველოში" - ფარგლებში ხორციელდება და მიზნად ისახავს საქართველოში ეროვნული სივრცითი მონაცემების ინფრასტრუქტურის (NSDI) შექმნის მხარდაჭერას.
ექსპერტების ვიზიტი 24 ივლისს დასრულდება.
