დღეს, 21 ივლისს, 10 საათზე, ბათუმში, სასტუმრო "შერატონში" ორდღიანი საერთაშორისო საპარლამენტო კონფერენცია გაიხსნება, რომლის მიზანია საქართველოს პროგრესის შეფასება ევროკავშირთან ინტეგრაციის გზაზე ასოცირების შესახებ შეთანხმებაზე ხელის მოწერის შემდეგ. კონფერენციას გახსნიან საქართველოს პარლამენტის თავმჯდომარე დავით უსუფაშვილი, ევროკავშირის წარმომადგენლობის ხელმძღვანელი ფილიპ დიმიტროვი და გაერო-ს განვითარების პროგრამის (UNDP) მუდმივი წარმომადგენელი საქართველოში ნილს სკოტი.
კონფერენციაზე გაიმართება მსჯელობა ისეთ საკითხებზე, როგორიცაა: საქართველოს კანონმდებლობის ევროპულ კანონმდებლობასთან ჰარმონიზაცია, ევროკავშირთან ინტეგრაციის პროცესში პარლამენტის საზედამხედველო როლი, ევროპელ პარტნიორებთან თანამშრომლობის გზები და საქართველოს მოქალაქეების ინფორმირება ევროკავშირთან ინტეგრაციის შესახებ.
ბათუმის კონფერენციაში მონაწილეობას მიიღებენ ვიშეგრადის ჯგუფის სახელმწიფოებისა და დიდი ბრიტანეთის პარლამენტების წევრები, დიპლომატიური მისიებისა და საერთაშორისო ორგანიზაციების წარმომადგენლები. საქართველოს წარადგენს პარლამენტისა და მთავრობის მაღალი რანგის დელეგაცია.
კონფერენციის ორგანიზატორია საქართველოს პარლამენტი ევროკავშირისა და გაერო-ს განვითარების პროგრამის (UNDP) ხელშეწყობით.
