იუსტიციის მინისტრის ინიციატივითა და „UNICEF"-ის ფინანსური მხარდაჭერით, დანაშაულის პრევენციის ცენტრი არასრულწლოვან ყოფილ მსჯავრდებულებს სხეულიდან ტატუირების მოცილებაში ეხმარება.
საქართველოს იუსტიციის მინისტრი თეა წულუკიანი და იუსტიციის სამინისტროს დანაშაულის პრევენციის ცენტრის დირექტორი ჯონი კვინიკაძე არასრულწლოვან ყოფილ მსჯავრდებულთა სხეულიდან ტატუირების (სვირინგის) მოცილების პროცესს დღეს დაესწრნენ. პროგრამის მიზანია, არასრულწლოვან ყოფილ მსჯავრდებულთა რეაბილიტაციისა პროცესის ხელშეწყობა და იმ დაღისაგან გათავისუფლება, რომელიც მათ მომავალში ციხეში ყოფნის პერიოდს გაახსენებთ. ტატუირების მოცილების პროცესს, ასევე, დაესწრნენ გაერო-ს ბავშვთა ფონდის წარმომადგენელი საქართველოში საშა გრაუმანი და ტენდერში გამარჯვებული კლინიკა „ესთელაინის" დირექტორი გია გვარამია.
იუსტიციის მინისტრის განცხადებით, დანაშაულის პრევენციის ცენტრი გაერო-ს ბავშვთა ფონდთან ერთად უკვე რამდენიმე თვეა, ახორციელებს პროექტს, რომელიც არასრულწლოვანი ყოფილი პატიმრებისთვის ტატუირების მოცილებას გულისხმობს. თეა წულუკიანის თქმით, ტატუირება ხშირად უშლით ხელს ციხიდან გამოსულ მოზარდებს მომავალ დამსაქმებელთან ინტერვიუზე მისვლაში, რაიმე საზოგადოებრივი და სოციალური აქტივობის წამოწყებაში.
„ტატუირების მოცილებით ჩვენ ვამარცხებთ ყოფილ პატიმრებთან მიმართებაში საზოგადოების სტიგმას, რაც გულისხმობს იმას, რომ, თუკი ერთხელ იყავი ციხეში, საზოგადოების სრულფასოვანი წევრი ვერასოდეს გახდები. პირიქით, ყოფილი პატიმარი, განსაკუთრებით კი, ბავშვი, აუცილებლად უნდა გახდეს საზოგადოების სრულფასოვანი წევრი. სწორედ ამას ემსახურება ტატუირების მოცილების პროგრამა", - განაცხადა იუსტიციის მინისტრმა და გია გვარამიას კლინიკას თანამშრომლობისათვის მადლობა გადაუხადა.
„მომავალშიც ჩვენ შევძლებთ თანამშრომლობას, იმისთვის, რომ ციხიდან გამოსული არასრულწლოვნები სწორ გზაზე დავაყენოთ და საზოგადოების სრულფასოვან წევრებად ვაქციოთ", - დასძინა თეა წულუკიანმა.
პროგრამის შესახებ კლინიკა „ესთელაინის" დირექტორმა გია გვარამიამაც ისაუბრა:
„ჩვენ დიდი სიხარულით ჩავერთეთ იუსტიციის სამინისტროს ამ პროექტში, რამდენადაც მიგვაჩნია, რომ ეს არის ძალიან მნიშვნელოვანი ინიციატივა ამ ბავშვების რესოციალიზაციისათვის. მას შემდეგ, რაც დასრულდება ეს პროგრამა, ჩვენ სიხარულით გავაგრძელებთ მუშაობას იუსტიციის სამინისტროსთან ერთად, რომ უფრო მეტი გავაკეთოთ ამ ახალგაზრდების ცხოვრების გაუმჯობესებისათვის".
არასრულწლოვანთა მართლმსაჯულების სისტემის რეფორმირების პროცესში მიღწეული პროგრესის შესახებ ისაუბრა საქართველოში გაერო-ს ბავშვთა ფონდის წარმომადგენელმა საშა გრაუმანმა.
„გაერო-ს ბავშვთა ფონდი ეხმარება საქართველოს მთავრობას არასრულწლოვანთა მართლმსაჯულების სისტემის რეფორმირების პროცესში. მნიშვნელოვანი პროგრესი იქნა მიღწეული: განახევრდა არასრულწლოვანთა რაოდენობა საპატიმროებში; მოხდა 600-ზე მეტი არასრულწლოვნის განრიდება კრიმინალური პასუხისმგებლობისაგან; გაუმჯობესდა სერვისი და არასრულწლოვნებს უფრო მეტი შანსი აქვთ რეაბილიტაციისა და რესოციალიზაციისათვის საზოგადოებაში, თუმცა, ჯერ კიდევ ბევრი რამ არის გასაკეთებელი", - აღნიშნა მან.
2013 წლის იანვარში იუსტიციის მინისტრი თეა წულუკიანი იმყოფებოდა სასჯელაღსრულების დეპარტამენტის ავჭალის არასრულწლოვანთა სარეაბილიტაციო დაწესებულებაში. არასრულწლოვან მსჯავრდებულებთან შეხვედრისას გამოიკვეთა სხეულზე გაკეთებული ტატუირების მოცილების საჭიროება. იუსტიციის მინისტრი დაუკავშირდა გაერო-ს ბავშვთა ფონდ „UNICEF"-ს, რომელიც პროექტის დაფინანსებას დათანხმდა. დანაშაულის პრევენციის ცენტრმა გრანტის სახით დაფინანსება მიიღო. ჩატარდა ტენდერი, რომელშიც გაიმარჯვა შპს „ესთელაინმა" (გია გვარამიას კლინიკა). ამ ეტაპისთვის პროგრამაში მონაწილეობს 37 არასრულწლოვანი; 15 ბენეფიციარმა დაასრულა და სრულად მოიშორა ტატუირება, 22 მოზარდი განაგრძობს პროცედურებს.
არასრულწლოვანი ყოფილი მსჯავრდებულების შემთხვევაში ხშირია სხეულზე ტატუირება, რომელიც მათ დაწესებულებაში ყოფნის პერიოდში გაიკეთეს. სასჯელისგან გათავისუფლების შემდეგ სხეულზე გაკეთებული სვირინგები მათ ხელს უშლით საზოგადოებაში ინტეგრაციაში, უჭირთ სამუშაოს მოძიება, არიან ნაკლებად თავდაჯერებულნი, განიცდიან დისკომფორტს.
პროგრამაში მონაწილეობა ნებაყოფლობითია. მასში ჩართულნი არიან მოზარდები როგორც თბილისიდან, ისე რეგიონებიდან. პროცედურები ტარდება პერიოდულად, 3 კვირის შუალედით. პროცედურების რაოდენობა და ხანგრძლივობა დამოკიდებულია ტატუირების ზომასა და ხარისხზე.