საჯარო რეესტრის თავმჯდომარე ტერიტორიული სარეგისტრაციო სამსახურების თანამშრომლებთან შეხვედრებს აგრძელებს.
დღეს სააგენტოს თავმჯდომარე პაპუნა უგრეხელიძე ქვემო ქართლის სარეგისტრაციო სამსახურების თანამშრომლებს შეხვდა, მათ მუშაობას ადგილზე გაეცნო, განხორცილებული სამუშაოები შეაჯამა და მიმდინარე პროექტები განიხილა.
შეხვედრაზე პაპუნა უგრეხელიძემ ხაზგასმით ისაუბრა სააგენტოს წარმატებისთვის რაიონის თანამშრომელთა შესაძლებლობების სწორი მიმართულებით გამოყენების მნიშვნელობის შესახებ. ასევე გაესაუბრა მარნეულის იუსტიციის სახლის იმ თანამშრომლებს, რომლებიც საჯარო რეესტრის დოკუმენტაციის მიღება-გაცემას ახორციელებენ. მათგან მოისმინა მოსაზრებები იმ პრობლემების შესაძლო გადაწყვეტის გზების შესახებ, რასაც მოქალაქეები ქონების რეგისტრაციისას აწყდებიან.
„ერთიანი სარეგისტრაციო პოლიტიკის დანერგვა და რეგისტრაციის ხარისხის ამაღლება სააგენტოს მენეჯმენტის მთავარი პრიორიტეტებია, რაშიც რაიონული სამსახურების ჩართულობას დიდი მნიშვნელობა ენიჭება. საჯარო რეესტრს სულ 64 ტერიტორიული ოფისი აქვს. ჩვენ ვგეგმავთ ყველა ტერიტორიული სამსახურის თანამშრომელს შევხვდეთ, მოვისმინოთ და გავითვალისწინოთ მათი მოსაზრებები, რათა ერთად შევძლოთ მომსახურების სტანდარტის ამაღლება და მოქალაქეთა კმაყოფილების მაჩვენებლის გაზრდა"-განაცხადა პაპუნა უგრეხელიძემ.
სარეგისტრაციო პრაქტიკის დახვეწისა და სრულყოფის მიზნით, სააგენტოს თავმჯდომარე უკვე ეწვია შიდა ქართლის, სამცხე-ჯავახეთის, აჭარის, იმერეთისა და სამეგრელოს ტერიტორიულ სარეგისტრაციო სამსახურებს.
