ხვალ, 15 ივლისს 15:00 საათზე ათასწლეულის გამოწვევის ფონდი - საქართველო, საქართველოს მთავრობის კანცელარიისა და განათლებისა და მეცნიერების სამინისტროსთან თანამშრომლობით სასტუმრო „შერატონ მეტეხი პალასის" საკონფერენციო დარბაზში გამართავს „სან დიეგოს სახელმწიფო უნივერსიტეტი და საქართველო 2020" პროექტის ინაუგურაციას. როგორც ,,ჯი-ეიჩ-ენს" ათასწლეულის გამოწვევის ფონდი - საქართველოდან აცნობეს ღონისძიება მოიცავს საქართველოს მთავრობასა და სან დიეგოს სახელმწიფო უნივერსიტეტს შორის თანამშრომლობის მემორანდუმის ხელმოწერას და სან დიეგოს სახელმწიფო უნივერსიტეტის ღია კარის დღეს სტუდენტებისა და პროფესორ-მასწავლებლებისათვის.
პრეზენტაციას გახსნის საქართველოს განათლებისა და მეცნიერების მინისტრი თამარ სანიკიძე, სან დიეგოს სახელმწიფო უნივერსიტეტის პროვოსტი პროფ. ნენსი მარლენი, ათასწლეულის გამოწვევის ფონდი - საქართველოს აღმასრულებელი დირექტორი მაგდა მაღრაძე.
„სან დიეგოს სახელმწიფო უნივერსიტეტი და საქართველო 2020" პროექტის ფარგლებში ამერიკის შეერთებული შტატებისა და საქართველოს სახელმწიფო უნივერსიტეტებისგან შემდგარი კონსორციუმი საქართველოში საბაკალავრო პროგრამებს განახორციელებს. აღნიშნული უნიკალური საგანმანათლებლო პროექტის შედეგად კურსდამთავრებულები საქართველოში მიიღებენ ამერიკულ დიპლომებს საინჟინრო, ტექნოლოგიებსა და საბუნებისმეტყველო სპეციალობებში. პროექტის ბიუჯეტია 30 მილიონი აშშ დოლარი.
სან დიეგოს სახელმწიფო უნივერსიტეტისა (SDSU) და ივ. ჯავახიშვილის თბილისის სახელმწიფო უნივერსიტეტის, ილიას სახელმწიფო უნივერსიტეტისა და საქართველოს ტექნიკური უნივერსიტეტისაგან შემდგარი კონსორციუმი სამეტაპიანი საერთაშორისო ტენდერის შედეგად შეირჩა.
სან დიეგოს სახელმწიფო უნივერსიტეტი საქართველოში 2014-2015 სასწავლო წლიდან შემდეგ საბაკალავრო პროგრამებს განახორციელებს: თბილისის სახელმწიფო უნივერსიტეტთან თანამშრომლობით განხორციელდება ელექტრული ინჟინერიის, ქიმიის (ბიოქიმიის კონცენტრაცია) და კომპიუტერული მეცნიერების საბაკალავრო პროგრამები. საქართველოს ტექნიკურ უნივერსიტეტში განხორციელდება ელექტრული ინჟინერიის (ენერგეტიკა) და ქიმიის (ბიოქიმიის კონცენტრაცია) ილიას სახელმწიფო უნივერსიტეტში განხორციელდება კომპიუტერული ინჟინერიისა და ელექტრული ინჟინერიის (მიკროელექტრონიკა) საბაკალავრო პროგრამები.
პროექტი ხორციელდება საქართველოსა და აშშ-ის შორის 2013 წელს ხელმოწერილი ათასწლეულის გამოწვევის კორპორაციის (MCC) მეორე 140 მილიონი აშშ დოლარის კომპაქტის ფარგლებში, რაც ითვალისწინებს ზოგადი, პროფესიული და უმაღლესი განათლების სექტორში პროექტების განხორციელებას. კომპაქტის მიზანია საქართველოში შრომის ბაზრის მოთხოვნების შესაბამისი ადამიანური კაპიტალის გაძლიერება საინჟინრო და ტექნოლოგიური სფეროს სპეციალისტების განვითარების შედეგად.
