შს მინისტრი ალექსანდრე ჭიკაიძე მთავრობის სხდომის დასრულების შემდეგ მისი უწყების მიერ საერთაშორისო ნარკოტრეფიკის ფაქტის გამოვლენას გამოეხმაურა და აღნიშნა, რომ ბევრი შს მინისტრი და სამინისტრო ვერ დაიკვეხნის ასეთი დიდი ოდენობის ნარკოტიკების აღმოჩენას.
"ის ნარკოტიკები ავღანური წარმოშობისაა, რომელიც ავღანეთი, ირანი, აზერბაიჯანი და შემდეგ საქართველოს გავლით უნდა მოხვედრილიყო ევროპაში. ჩემი თანამშრომლების დამსახურებაა, რამდენიმეთვიანი მუშაობის შედეგად გავიდნენ ამ ნარკოტრეფიკში და აქტიურად ვაგრძელებთ კვლავ მუშაობას. მადლობა მინდა გადავუხადო ყველა იმ თანამშრომელს ვინც მუშაობდა, ესაა უპრეცედენტო შემთხვევა. მე მგონი ბევრი შს მინისტრი და სამინისტრო ვერ დაიკვეხნის ასეთი დიდი ოდენობის ნარკოტიკების აღმოჩენას", - განაცხადა ჭიკაიძემ.
შეგახსენებთ, რომ 11 ივლისს შინაგან საქმეთა სამინისტროს და ფინანსთა სამინისტროს შემოსავლების სამსახურის თანამშრომლებმა, ერთობლივად ჩატარებული ოპერატიულ-საგამოძიებო ღონისძიების შედეგად, საერთაშორისო ნარკოტრეფიკის ფაქტი გამოავლინეს. აღნიშნულ ფაქტზე დაკავებულია საქართველოს ორი მოქალაქე.
სამართალდამცველებმა სატვირთო ავტომობილის ჩხრეკისას დაახლოებით 2 ტონა და 790 კილოგრამი თხევადი ჰეროინი აღმოაჩინეს. აღსანიშნავია, რომ მსგავსი ოდენობის ნარკოტიკული საშუალება სამართალდამცველებს დღემდე არ ამოუღიათ და ეს უპრეცედენტო ფაქტია.
გამოძიებამ დაადგინა, რომ სატვირთო ავტომობილი საქართველოში აზერბაიჯანის რესპუბლიკიდან შემოვიდა და თურქეთის მიმართულებით მოძრაობდა. სამართალდამცველებმა სატვირთო ავტომობილიდან 93 ერთეული 30 კილოგრამიანი კასრი თხევადი ჰეროინით ამოიღეს. საექსპერტო-კრიმინალისტიკური სამსახურის წინასწარი ცნობით, აღნიშნული ნარკოტიკული საშუალება 80% სუფთა ჰეროინს შეიცავს, რომლის საბაზრო ღირებულება ასეულობით მილიონ დოლარს შეადგენს.
გამოძიება ნარკოტიკული საშუალების უკანონო ტრანზიტით საერთაშორისო გადაზიდვის ფაქტზე მიმდინარეობს.
