საჯარო რეესტრის ეროვნული სააგენტო ქვეყნის აეროფოტოგადაღების პროექტს ახორციელებს. პროექტით გათვალისწინებული აერო და კოსმოსური გადაღებები საქართველოს მთელ ტერიტორიას დაფარავს. გადაღებულ მასალებს საჯარო რეესტრი უძრავი ქონების რეგისტრაციისა და კადასტრის მაღალი ხარისხით წარმოებისთვის საბაზო რუკებად გამოიყენებს, ხოლო აეროფოტო გამოსახულებების დამუშავების შედეგად შექმნილ ახალ ციფრულ 3-განზომილებიან ორთოფოტოგეგმებს - სახელმწიფო კადასტრის კარტოგრაფიულ საფუძვლად.
საჯარო რეესტრში არსებული ორთოფოტოგეგმების მონაცემები დღეს, პრაქტიკულად, მოძველებულია და არსებულ მდგომარეობას არ ასახავს.
საქართველოს ტერიტორიის კონკრეტული არეალების ნაწილის აეროფოტოგადაღება, სახელმწიფოს დაკვეთით, სულ 3-ჯერ განხორციელდა (2000, 2005 და 2010 წწ.). სამოქმედო გეგმის არარსებობის გამო, გადაღება სპონტანურად ხდებოდა. მათზე დაყრდნობით, ორთოფოტოგეგმების მნიშვნელოვანი ნაწილი ტექნოლოგიური დარღვევებით შეიქმნა, რის გამოც დასახული ამოცანისთვის საჭირო სიზუსტეს ვერ უზრუნველყოფდა.
ამ პრობლემის გამოსასწორებლად, საჯარო რეესტრმა ახალი აეროფოტოგადაღების პროექტი დაიწყო, რომელიც გეოინფორმაციული, კარტოგრაფიული და ტოპოგრაფიული მონაცემების შექმნისათვის ყველაზე საიმედო და ეკონომიურ მეთოდად მიიჩნევა. ახალი აეროფოტოგადაღების მასალებზე დაყრდნობით, საჯარო რეესტრი ახალ ორთოფოტოგეგმებს შეიმუშავებს, რომელშიც სრულად იქნება გათვალისწინებული საერთაშორისო სტანდარტები და პრაქტიკა.
შედეგად, მიღებული ერთგვაროვანი და კორექტირებული ციფრული მონაცემები ხელს შეუწყობს სახელმწიფოებრივი მნიშვნელობის დარგების განვითარებასა და სწორად დაგეგმვას. საჯარო რეესტრის აეროგადაღების მასალების საბაზო ინფორმაციად გამოყენებას ასევე შეძლებენ სივრცით ტერიტორიულ მოწყობასა და განვითარებასთან დაკავშირებულ პროექტებში, მშენებლობაზე, ენერგეტიკაში, სატრანსპორტო ქსელის, ინფრასტუქტურული სამუშაოების დაპროექტებისას და სხვ.
საჯარო რეესტრმა აეროგადაღებების პროექტი 2014 წლის გაზაფხულზე დაიწყო. ამ დროისთვის, აეროგადაღება სრულად განხორციელდა დასავლეთ საქართველოს 8 მუნიციპალიტეტსა და 3 ქალაქში (სენაკის, ხობის, აბაშის, ლანჩხუთის, სამტრედიის, წყალტუბოს, ტყიბულის, თერჯოლის მუნიციპალიტეტები და ბათუმი, ფოთი და ქუთაისი), ხოლო 17 მუნიციპალიტეტში სამუშაოები ნაწილობრივ დასრულებულია (წალენჯიხა, ჩხოროწყუ, მარტვილი, ზუგდიდი, ხონი, ცაგერი, ამბროლაური ჭიათურა, ხარაგაული, ზესტაფონი, ბაღდადი, ვანი, ჩოხატაური, ოზურგეთი, ქობულეთი, ხელვაჩაური და ქედა).
გადაღებული საერთო ფართობი 8800 კმ2-ს მოიცავს.
რაც შეეხება სახელმწიფო საზღვრის მიმდებარე ტერიტორიებს, აეროგადაღების ნაცვლად, საჯარო რეესტრი ამ ტერიტორიის სატელიტურ სურათებს შეისყიდის. საპროექტო ტერიტორია მოიცავს ზუგდიდის, წალენჯიხისა და ხელვაჩაურის მუნიციპალიტეტებს, რომლის საერთო ფართობი 1473კმ2 -ია.
2013 წელს საჯარო რეესტრის მიერ უკვე განხორციელდა 4 ადმინისტრაციულ ერთეულის (გორის, კასპის, ქარელისა და საჩხერის მუნიციპალიტეტები) 2008-2013 წლის სატელიტური მონო სურათების შესყიდვა, რომლის საერთო ფართობი შეადგენს 1186,7 კმ2. მონო გამოსახულების შესყიდვის შედეგად ზემოთაღნიშნულ ტერიტორიებზე მოხდა არსებული ორთოფოტოგეგმის სრულად განახლება.
ქვეყნის ტერიტორიის სრული აეროგადაღება 2018 წელს დასრულება
