თავდაცვის მინისტრის ირაკლი ალასანიას განცხადებით, ნატოს გენერალური მდივნის სპეციალური წარმომადგენელი ნატოსა და ცენტრალურ აზიაში ჯეიმს აპატურაი მართალია, როცა ამბობს, რომ საქართველო დღეს ნატოში სრული წევრობისთვის მზად არ არის. როგორც ალასანიამ განაცხადა კიდევ დაგვჭირდება გარკვეული წლები რათა გავხდეთ ნატოს სრულყოფილი წევრი.
,,ჯეიმს აპატურაი მართალია, როცა იძახის, რომ საქართველო დღეს ნატოში სრული წევრობისთვის მზად არ არის. დღეს საქართველო და ნატო საუბრობს ინტეგრაციის შემდეგ ნაბიჯზე, რომელიც არის გაწევრიანების სამოქმედო გეგმა, ე.წ. MAP ჩვენ კიდევ დაგვჭირდება გარკვეული წლები რომ გავხდეთ სრულად მზად პოლიტიკური სისტემით, უსაფრთხოების ზომებით და თავდაცვისუნარიანობის დონით ნატოს წევრი და აქ არაფერი გასაკვირი არ არის. ჩვენ ვსაუბრობთ შემდეგ ნაბიჯზე საქართველოს ნატოსთან ინტეგრაციის პროცესში", _განაცხადა ალასანიამ.
მისივე განმარტებით, რეგიონული უსაფრთხოების კონტექსტიდან გამომდინარე ნატომ საქართველოსთან ძალიან მალე უნდა დაიწყოს გაწევრიანებასთან დაკავშირებული მოლაპარაკებები.
,,თუმცა ვთვლი რომ ის რაც ხდება უკრაინაში, რუსეთის აგრესია და რეგიონული უსაფრთხოების კონტექსტი, უნდა გვკარნახობდეს, რომ საქართველოსთან ძალიან მალე უნდა დაიწყოს გაწევრიანებასთან დაკავშირებული მოლაპარაკებები. ეს არის ჩვენი სურვილი", -განაცხადა ალასანიამ.