ვიზიტის ფარგლებში სააგენტოს წარმომადგენლები შვედეთის მიწის საინფორმაციო სისტემას, კადასტრისა და რეგისტრაციის პროცედურების ძირითად პრინციპებს და "Lantmateriet"-ის საქმიანობას გაეცნობიან. შვედი სპეციალისტები სააგენტოს მენეჯმენტს მონაცემთა ხარისხის გაუმჯობესების, საკუთრების უფლების დაცულობის, ინფორმაციული ტექნოლოგიების განვითარების, საკადასტრო სტანდარტების დანერგვის და სხვა საკითხებთან დაკავშირებით კონსულტაციებს გაუწევენ.

როგორც სააგენტოს თავმჯდომარემ, პაპუნა უგრეხელიძემ აღნიშნა: „სააგენტოსა და ლანდმატერატს 10 წლიანი თანამშრომლობა აკავშირებთ. ამ ხნის განმავლობაში შვედურმა მხარემ მნიშვნელოვან წვლილი შეიტანა ქართული სარეგისტრაციო სისტემის ჩამოყალიბების პროცესში. ახლა უკვე სააგენტო განვითარების ახალ ეტაპზეა გადასული. მიმდინარეობს საჯარო რეესტრის ძირითად მიმართულებების ცენტრალიზაცია, ასევე, სარეგისტრაციო სამსახურების გამსხვილება რეგიონულ დონეზე, რაც ხელს შეუწყობს ერთიანი სარეგისტრაციო პოლიტიკის შემუშავებას და დანერგვას ქვეყნის მასშტაბით. შვედეთს ამ მიმართულებით აქვს კარგი გამოცდილება და ამ გამოცდილების გაზიარება ჩვენი კოლეგებისგან მნიშვნელოვნად დაგვეხმარება პროცესის სწორად დაგეგმვაში. ვიზიტის ფარგლებში ახალი თანამშრომლობის ფორმატი შემუშავდება, რომელიც იმ ძირითად პრინციპებზე იქნება აგებული, რა გამოწვევებიც აქვს დღეს ჩვენს ქვეყანაში საჯარო რეესტრის ეროვნულ სააგენტოს".

ვიზიტის განმავლობაში ქართული დელეგაცია ქ. ნორტალიესაც ესტუმრება და ლანტმატერიატის ტერიტორიულ ოფისს მოინახულებს, ასევე, დაათვალიერებს შვედეთის მუდმივმოქმედი სარეფერენციო სადგურების - SWEPOS საკონტროლო ცენტრს ქ. იავლეში.

ვიზიტი, რომელიც 22 ივნისს დასრულდება, შვედეთის საერთაშორისო განვითარების სააგენტოს (SIDA) მხარდაჭერით ხორციელდება.