იუსტიციის მინისტრი თეა წულუკიანი ნაძალადევის რაიონში მშენებარე მედიაციის სახლს ესტუმრა. იუსტიციის მინისტრმა მედიაციისა და პრემედიაციისათვის განკუთვნილი სივრცეები, ტრენინგების ოთახები, ახალგაზრდული ცენტრის დარბაზები დაათვალიერა და მშენებლობის პროცესში ჩართულ პირებსაც გაესაუბრა.
მედიაციის სახლში იუსტიციის სამინისტროს მმართველობის სფეროში მოქმედი სსიპ „დანაშაულის პრევენციის ცენტრის" ორი სამმართველო განთავსდება, რომლებიც არასრულწლოვანთა დანაშაულის პრევენციისა და ყოფილი პატიმრების რესოციალიზაციის მიმართულებით იმუშავებს. დღემდე ეს სამმართველოები იუსტიციის სახლში ფუნქციონირებენ, ახალი შენობის საჭირობა კი მას შემდეგ დადგა, რაც დანაშაულის პრევენციის ცენტრმა მედიაციის გაფართოების გადაწყვეტილება მიიღო. აქამდე მედიაცია მხოლოდ იმ არასრულწლოვნებისათვის ხორციელდებოდა, რომლებმაც პირველად ჩაიდინეს ნაკლებად მძიმე დანაშაული. პროკურორის მიერ გადაწყვეტილების მიღების ეტაპიდან „ერთი შანსის პროგრამაში" ერთვებოდა კანონთან კონფლიქტში მყოფი მოზარდი და სისხლისსამართლებრივი პასუხისმგებლობისაგან განრიდების მიზნით მასზე ზრუნვას სწორედ დანაშაულის პრევენციის ცენტრის თანამშრომლები იწყებდნენ.
დანაშაულის პრევენციის ცენტრის დახმარებით სისხლის სამართლის პასუხისმგებლობას და, შესაბამისად, სასჯელაღსრულების დაწესებულებებს 136 არასრულწლოვანი განერიდა. ახალ შენობაში გადასვლის შემდეგ დანაშაულის პრევენციის ცენტრი მუშაობას საოჯახო მედიაციის კუთხით გეგმავს. პროგრამა კონფლიქტურ ოჯახებს პრობლემების მოგვარებაში დაეხმარება. პრიორიტეტული იქნება ისეთი შემთხვევები, რომლებიც არასრულწლოვანთა ინტერესებს აზიანებს ან მათზე ძალადობის საფრთხეს შეიცავს. მათი ინტერესების დაცვისათვის ცენტრი ინტენსიურად ითანამშრომლებს ადამიანის ვაჭრობის (ტრეფიკინგის) მსხვერპლთა, დაზარალებულთა დაცვისა და დახმარების სახელმწიფო ფონდსა და სოციალური მომსახურების სააგენტოსთან.
მედიაციის სახლში სპეციალური პროგრამები ამოქმედდება იმ მოზარდებისათვის, რომლებსაც არ ჩაუდენიათ დანაშაული, მაგრამ ხასიათდებიან ანტისოციალური ქცევით და მათი მხრიდან კანონდარღვევის რისკი მაღალია. სპეციალურად მათთვის იმუშავებს ახალგაზრდული ცენტრი, სადაც არასრულწლოვნებს დროის საინტერესოდ და ნაყოფიერად გატარების საშუალება ექნებათ. ინტერესთა შესაბამისად, ისინი სხვადასხვა სასწავლო და სპორტულ აქტივობაში ჩაერთვებიან, ისწავლიან თავიანთი შესაძლებლობების სწორად გამოყენებას. ახალგაზრდული კლუბი არასრულწლოვნებს ე.წ. ქუჩური გართობის ალტერნატივას შესთავაზებს.
აქვე განთავსდება ტრენინგების ოთახები ყოფილი პატიმრების რესოციალიზაცია-რეაბილიტაციის პროგრამასა და განრიდება-მედიაციის პროექტში ჩართულებისათვის.
მედიაციის სახლის ინტერიერი მყუდრო და კომფორტული იქნება, რათა დახმარების საჭიროების მქონე მისმა სტუმრებმა თავი უსაფრთხოდ და დაცულად იგრძნონ და ამ სივრცეში თავისუფალი დროის გატარების სურვილი გაუჩნდეთ; იუსტიციის სამინისტროს სსიპ „დანაშაულის პრევენციის ცენტრის" თანამშრომლებს კი შესაძლებლობა მიეცემათ, კიდევ უფრო მეტი სერვისი შესთავაზონ მათ და დაეხმარონ საზოგადოებაში საკუთარი ადგილის პოვნაში.