დღეს, 16 ივნისს, 18:00 საათზე, მწერალთა სახლში მაია თაბუკაშვილთან შეხვედრა გაიმართება.
მწერალთა სახლში მთარგმნელი მაია თაბუკაშვილი წაიკითხავს თავის ლექსებს ქართულ და გერმანულ ენებზე და ისაუბრებს გერმანიაში მისი საქმიანობის შესახებ.
1997 წლიდან მაია ცხოვრობს და მოღვაწეობს გერმანიაში. სწავლობდა ქალაქ ბამბერგში, ოტო ფრიდრიხის უნივერსიტეტის გერმანისტიკისა და ლიტერატურათმცოდნეობის ფაკულტეტზე. 2005 წლიდან არის ქართული ენის თარჯიმანი და მთარგმნელი.
ბამბერგში ჩატარებული აქვს არაერთი ღონისძიება კინოხელოვნების და ლიტერატურის სფეროში. მაია თაბუკაშვილი ორენოვანი პოეტია - წერს ქართულ და გერმანულ ენებზე.
ბოლო წლებში აქტიურად ჩართულია ქართული ლიტერატურის ევროპაში პოპულარიზაციის საქმეში. ლიტერატურული თარგმანები: ანა კორძაია-სამადაშვილის „ისტორიული მეხსიერება", ზაზა ბურჭულაძის „გასაბერი ანგელოზი",(ნაწყვეტი გამოქვეყნდა 2012 წელს გამომცემლობა" artpress"-ში.), ეკა თხილავა „ცხრა ქოხში"და ა.შ.
მისი ნაწარმოებები ქვეყნდება გერმანიაში. გარდა ამისა ,არის ფრანკფურტის ლიტერატურული სალონის „ოიტერპეს" აქტიური წევრი, ასევე თბილისი - ბერლინის სალონის ერთ-ერთი წარმომადგენელი, როგორც ავტორი და მთარგმნელი. მონაწილეობას იღებს გერმანიის სხვადასხვა ქალაქებში (ფრანკფურტი,ლაოფციგი,მიუნხენი, ბერლინი, ბამბერგი) გამართულ ლიტერატურულ საღამოებსა და ფესტივალებში.
