10 ივნისს იუსტიციის სამინისტროს სსიპ დანაშაულის პრევენციის ცენტრის გუნდი მინი-ფეხბურთის ტურნირში - „ბიზნესის ჩემპიონთა ლიგა" - თასის მფლობელი გახდა. დანაშაულის პრევენციის ცენტრის გუნდის წევრები არიან როგორც ცენტრის თანამშრომლები, ასევე ყოფილი პატიმრები - რეაბილიტაციისა და რესოციალიზაციის პროგრამის ბენეფიციარები.
რეაბილიტაციისა და რესოციალიზაციის პროგრამა იუსტიციის მინისტრის ინიციატივით 2012 წელს ამოქმედდა. მას დანაშაულის პრევენციის ცენტრი ახორციელებს. პროგრამის მიზანი სასჯელაღსრულების დაწესებულებებიდან გათავისუფლებული პირების რეაბილიტაციის ხელშეწყობაა. პროგრამის ბენეფიციარები ხშირად იღებენ მონაწილეობას მსგავს სპორტულ, კულტურულ თუ საგანმანათლებლო ღონისძიებებში.
„ბიზნესის ჩემპიონთა ლიგა" საქართველოს სპორტისა და ახალგაზრდობის საქმეთა სამინისტროს, საქართველოს ეროვნული ფედერაცია „სპორტი ყველასათვის" მხარდაჭერით და სპორტული სააგენტოს SBM GEORGIA ორგანიზებით გაიმართა. მასში მონაწილეობა სახელმწიფო, კომერციულმა და სასწავლო ორგანიზაციებმა მიიღეს.
მოგებულ საპრიზო თანხას (3000 ლარი) დანაშაულის პრევენციის ცენტრი განრიდებულ არასრულწლოვანთა საქველმოქმედო ფონდში გადარიცხავს, რის შედეგადაც განრიდებულ არასრულწლოვნებს სხვადასხვა სახის სპორტული, კულტურული, საგანმანათლებლო და სარეაბილიტაციო პროექტები დაუფინანსდებათ.