ბათუმში მოსახლეობის საცხოვრებელი პირობების გაუმჯობესებას, ქალაქის განაშენიანების ხელშეწყობას, ინვესტიციების მოზიდვას, ახალი სამუშაო ადგილების შექმნას და სამშენებლო ბიზნესის სტიმულირებას ისახავს მიზნად ხელისუფლებს პროექტი „ახალი ბინები ბათუმში ბარაკების ნაცვლად," რომლის პრეზენტაციაც მიმდინარე წლის 11 ივნისს ბათუმში შედგა.
პროექტის დეტალები სამშენებლო კომპანიების წარმომადგენლებს, საფინანსო ორგანიზაციებსა და მოწვეულ სტუმრებს ფინანსთა მინისტრმა ნოდარ ხადურმა, აჭარის მთავრობის თავმჯდომარემ არჩილ ხაბაძემ და აჭარის ფინანსთა და ეკონომიკის მინისტრმა დავით ბალაძემ გააცნეს.
აჭარის ა/რ მთავრობამ მერიასთან ერთად, ჯანსაღი, უსაფრთხო საზოგადოებრივი და საცხოვრებელი გარემოს შექმნისათვის შეიმუშავა „ბათუმში არასათანადო-არასტანდარტული საცხოვრისის ლიკვიდაციის სახელმწიფო მიზნობრივი პროგრამა". პროექტის ფარგლებში თავდებობის თანხის ოდენობა 20 მილიონი აშშ დოლარით განისაზღვრა.
 პროექტის ვადა - არაუმეტეს 3 წელი (სამშენებლო კომპანიას, ბანკსა და აჭარის მთავრობას შორის ხელშეკრულების დადების დღიდან);
 პროექტის ღირებულება - არაუმეტეს 3 მლნ აშშ დოლარი.
პროგრამის მიზანია, ქალაქის ადმინისტრაციულ საზღვრებში ამორტიზებული, ავარიული, უსახური, ე.წ. ბარაკული ტიპის, საცხოვრებლად უვარგისი შენობების ლიკვიდაცია.
პროექტის დასრულების შემდეგ გაუმჯობესდება მოსახლეობის საცხოვრებელი პირობები, ქვეყნის ერთ-ერთ ყველაზე მზარდ ტურისტულ ქალაქში უსახური შენობების ნაცვლად, აშენდება თანამედროვე დიზაინის საცხოვრებელი სახლები, კიდევ უფრო გალამაზდება ქალაქის იერსახე.